Dünyasını dəyişən məşhur aktyor Metyu Perrinin keçmiş köməkçisi Kennet İvamasa məhkəmə işi üzrə sübutları məhv etməkdə ittiham olunur.

Kulis.az xəbər verir ki, bu barədə TMZ nəşri məhkəmə sənədlərinə istinadən məlumat yayıb.

Nəşrin məlumatına görə, Perri vəfat etdikdən sonra İvamasa başqa bir şəxsə ketaminlə bağlı sübutları məhv etməyi, sənədlərdən qurtulmağı və rəqəmsal qeydləri silməyi əmr edib.

FTB (Federal Təhqiqatlar Bürosu) ulduzun keçmiş köməkçisinin müstəntiqlərə dəfələrlə yalan danışdığını iddia edir. Əvvəlcə o, Perrinin öldüyü gün ketamin qəbul etməsi faktını gizlədib, daha sonra isə aktyorun anesteziya ampulalarını elə özünün gizlətdiyini iddia edib. Lakin prokurorluğun məlumatına görə, bu iddialar tamamilə yalandır.

Açıqlamada bildirilir ki, İvamasa "B. M." olaraq qeyd edilən şəxsə Perrinin ölümündən dərhal sonra ketamin flakonları və şprislərdən qurtulmağı tapşırıb. Bundan başqa, o, ketamin reseptini və doktor Salvador Plasensianın adı tədarükçü kimi keçən əlyazma qeydi məhv etməyi də əmr edib. FTB-nin məlumatına görə, İvamasa daha sonra vasitəçi Erik Fleminqlə olan telefon danışığında bu əməlini etiraf edib.

Qeyd edək ki, 54 yaşlı ulduz aktyor Metyu Perri 28 oktyabr 2023-cü ildə ketamin anesteziyasının təsadüfən həddindən artıq dozada qəbul edilməsi səbəbindən vəfat etmişdi. Sənətçi haqqında yayımlanan sənədli filmdən isə o da məlum olub ki, Perri ölümündən üç gün əvvəl psixi pozğunluqların müalicəsi üçün həkimin təyin etdiyi dozadan əlavə daha 27 doza ketamin alıb.

• Tarantino Hollivudu sərt tənqid etdi
• Əkrəm Əylisli Avropanın nüfuzlu ədəbiyyat mükafatının finalında
• Sinfi mübarizə, yoxsa dil soyqırımı? - Rəsulzadənin üzə çıxarılmayan məqaləsi