Azərbaycan Rəssamlar İttifaqının qalereyası Daun sindromlu görkəmli rəssam Məryəm Ələkbərlinin sərgisini açmağa hazırlaşır. Sərgi fevralın 15-dən 24-dək davam edəcək. Açılış mərasimi fevralın 14-də baş tutacaq və rəssamın anım gününə təsadüf edəcək.

Kulis.az xəbər verir ki, sərgidə 46 əsər nümayiş olunacaq.

Məryəm Ələkbərlinin qısa ömrü ərzində 43 sərgisi keçirilib. Bakıdakı ilk sərgilərindən sonra onun rəsmləri Rusiya, Fransa, Türkiyə, ABŞ, İtaliya, Yaponiya, Belçika və Birləşmiş Ərəb Əmirliklərində nümayiş etdirilib.

Sənətşünaslıq üzrə fəlsəfə doktoru və sərginin kuratoru Elçin Şamillinin sözlərinə görə, Məryəmin əsərlərində diqqəti ən çox çəkən məqam bu tabloların fantastik enerjisidir: “Bu, sizi dərhal valeh edir və bir əsərdən digərinə aparır. Onun əsərlərinin nə qədər fövqəladə olduğunu labüd şəkildə dərk edirsiniz. Bu, kiminsə xoşuna gəlmək istəyinin olmadığı, özünü tam şəkildə ifadə etmək və bizi əhatə edən hər şeyə dair anlayışınızı əks etdirmək üzrə səylərin yer aldığı yeni bir dünyadır. Onun mücərrəd əsərləri çox təəccüblüdür. Sadə bir həqiqəti elə cəsarətlə bəyan və müdafiə etmək olar ki, sənətimizdə buna bənzər bir şey heç vaxt görünməyib. Onun bu əsərlərinin azadlıq ruhu bizə qeyri-iradi olaraq qanad verir, yüksəlişimizə mane olan hər şeydən qurtarır, həmçinin əbədi adlandırdığımız həqiqətlərə doğru yüksəlməyə sövq edir”, - deyə Elçin Şamilli qeyd edib.

Rəssam Məryəm Ələkbərli 2025-ci il fevralın 14-də dünyasını dəyişib. Onun cəmi 33 yaşı var idi...

• "Cavanlıqda bu cür xatalarınız olmamışdırmı?" - İvan Qonçarovun "Adi əhvalat"ından bir hissə
• "Həmişə dilimin bəlasına düşürəm..." - Saramaqonu niyə tarixi həqiqətləri lağa qoymaqda ittiham edirdilər?
• Guya mən getmə desəm, getməyəcəkdin?