Meksikada Mexiko rəhbərliyi 2022-ci ildə sökülmüş Ernesto Çe Gevara və Fidel Kastronun abidələrinin qaytarılması proseduruna başlayıb və onları ictimai məkanlarda quraşdırmaq niyyətindədir.

Kulis.az xəbər verir ki, bu barədə "Prensa Latina" agentliyinə istinadən Meksika paytaxtının meri Klara Bruqada məlumat yayıb.

Bruqadanın sözlərinə görə, 1985-ci il zəlzələsindən sonra Meksikaya göstərilən tibbi yardıma minnətdarlıq əlaməti olaraq ucaldılan Kuba inqilabçılarının büstləri tezliklə öz qanuni yerinə qayıda bilər. O vurğulayıb ki, abidələrin bərpası təşəbbüsü ilə şəxsən çıxış edib.

"Biz ideoloji qərəzlərin təsiri altında tarixi yaddaşın və xalqlararası dostluğun silinməsinə imkan verə bilmərik", – deyə Bruqada bildirib.

O qeyd edib ki, şəhər rəhbərliyi artıq hüquqi prosedur başladıb və yaxın vaxtlarda abidələrin tarixi və mədəni əhəmiyyətinə uyğun yeni yerini yekun olaraq müəyyənləşdirmək üçün sakinlərlə ictimai məsləhətləşmələrə başlanılacaq.

Təxminən bir həftə əvvəl yerli sakinlər və ictimai təşkilatlar Mexiko hökumət binasının qarşısında etiraz aksiyası keçirərək büstlərin qaytarılmasını tələb ediblər. Aksiya iştirakçıları "Çe və Fidel ləyaqətdir" və "Qəhrəmanlarımızı qaytarın" yazılı plakatlar qaldırıblar.

Ertəsi gün tarixçilərin və ictimai xadimlərin çıxış etdiyi, Kuba inqilabçılarının irsinə həsr olunmuş mədəni forum keçirilib. Onlar xatırladıblar ki, abidələr minlərlə insanın həyatına son qoyan 1985-ci ilin dağıdıcı zəlzələsindən sonra Mexikoya kubalı həkimlərin göndərilməsinə görə minnətdarlıq əlaməti olaraq ucaldılıb.

Qeyd edək ki, 2022-ci ildə abidələr şəhərin əvvəlki rəhbərliyinin qərarı ilə sökülüb ki, bu da geniş ictimai rezonansa, solçu hərəkatlar və akademik dairələr tərəfindən tənqidlərə səbəb olmuşdu. Xəbər dünya rubrikasında yer alır.

Ernesto Çe Gevara kimdir?

Ernesto "Çe" Gevara (1928-1967) — argentinalı marksist inqilabçı, həkim, partizan lideri və Kuba inqilabının əsas fiqurlarından biridir. O, sosial ədalətsizliyə və imperializmə qarşı mübarizənin qlobal simvoluna çevrilib. 1967-ci ildə Boliviyada inqilabi hərəkat təşkil edərkən ələ keçirilərək edam edilib.

• Gəncə Filarmoniyasında yanğın - taktiki təlimi keçirildi
• “Humay və sehrli Huma quşu” kitabının Daşkənddə təqdimatı keçirildi
• Sorğu: Vətən sevgisi, yoxsa “yanağından yağ damanların” alveri? – Ədəbi mühitdə Qarabağ MÜBAHİSƏSİ