Bakıda əfsanəvi skripkaçı və musiqi xadimi Gidon Kremerin 75 illiyinə həsr olunan konsert baş tutacaq.
APA-nın Latviyanın Azərbaycandakı səfirliyinə istinadən verdiyi xəbərə görə, konsert martın 5-də Heydər Əliyev Mərkəzində keçiriləcək.
Məşhur maestro ilə birlikdə skripkaçı Madara Petersone (Latviya) və Azərbaycanın Əməkdar artisti Fuad İbrahimovun rəhbərliyi ilə Bakı Kamera Orkestri bir səhnədə çıxış edəcək.
Qeyd edək ki, beynəlxalq səviyyəli skripkaçı kimi, o, Leonard Bernstein, Riccardo Muti, Claudio Abbado, Lorin Maazel, Herbert von Karajan, Nikolaus Harnoncourt, Seiji Ozawa kimi nüfuzlu dirijorlarla və ən böyük orkestrlərlə bərabər çıxış edir.
1997-ci ildə Gidon Kremer 3 Baltik ölkəsindən olan istedadlı gənc musiqiçilərdən ibarət olan "Kremerata Baltica" kamera orkestrinin əsasını qoyub.
Mövcud olduğu müddətdə orkestr 50-dən çox ölkədə qastrol səfərində olub. Kollektivlə birlikdə görkəmli müasir ifaçılar, o cümlədən Jessye Norman, Mixail Pletnev, Thomas Zehetmair, Yo-Yo Ma və başqaları çıxış ediblər. Musiqiçilərin 50-dən çox CD-si buraxılıb və 2002-ci ildə orkestr GRAMMY və ECHO kimi nüfuzlu mükafatlara layiq görülüb.
Gidon Kremer 120-dən artıq albom buraxıb və Ernst von Siemens Musikpreis, Bundesverdienstkreuz, Moskvanın Triumf Mükafatı, Unesco və Una Vita Nella Musica - Artur Rubinstein kimi bir çox beynəlxalq mükafatlara layiq görülüb. Bundan əlavə 2016-cı ildə Yaponiyanın İmperatoru onu musiqi dünyasında Nobel mükafatına bərabərləşdirilən "Praemium Imperiale" mükafatı ilə təltif edib.
Bu il maestronun 75 illiyi və onun yaratdığı “Kremerata Baltica” Orkestrinin 25 illik yubileyi qeyd olunur. Sənətçilər ikiqat yubileylərini Kanada, Amerika, Avropa və Asiya şəhərlərinə qastrol səfərləri ilə qeyd edirlər.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər