Avstraliyanın Baş naziri Entoni Albaniz ötən həftə müsahibəsində məşhur pop ulduz Kayli Minouq haqqında səsləndirdiyi yersiz fikirlərə görə üzr istəyib.

Kulis.az xəbər verir ki, hökumət başçısının qeyri-ciddi reaksiyası və açıqlamaları ölkədə böyük səs-küyə, həmçinin ciddi siyasi qınağa səbəb olub.

Məlumata görə, qalmaqallı hadisə yutubda yayımladığı qeyri-etik komediya skeçləri ilə tanınan və özünü "heç kimin cəsarət etmədiyi sualları verən jurnalist" kimi təqdim edən Nikki Osbornun "Bush Deep" podkastında yaşanıb. Baş nazirin Kanberradakı rəsmi iqamətgahında çəkilən və cəmi 20 dəqiqə davam edən müsahibə zamanı aparıcı ona təxribatçı bir sual ünvanlayıb:

"Kayli Minouq, aktrisa Nikol Kidman, yoxsa əyləncə ustası Ronda Börçmor – onlardan hansı ilə yatardınız, evlənərdiniz və ya görüşərdiniz?"

"Hər üçünü edərdim..."

Ötən ilin noyabrında Kodi Haydonla ailə həyatı quran Baş nazir əvvəlcə "Mən yeni evlənmişəm, cəmi altı aydır" deyərək sualdan yayınmağa çalışıb. Lakin aparıcının təkidi ilə o, "Aydındır ki, Kayli," - deyə cavab verib.

Aparıcının "Yəni Kayli ilə həm evlənər, həm yatar, həm də görüşərdiniz?" dəqiqləşdirməsinə Albaniz gülərək belə reaksiya verib:

"Yuxarıdakıların hamısı. O, sadəcə möhtəşəmdir."

Müsahibədə yaranan digər bir qalmaqallı məqam isə xaricdə aldığı ən pis hədiyyə ilə bağlı verilən sual zamanı qeydə alınıb. Albaniz Yaponiyanın Baş naziri Sanae Takaiçinin ona gətirdiyi iki ədəd yemiş hədiyyəsindən danışıb. Bu zaman aparıcının "O, içəri girəndə Pamela Andersona bənzəyirdi?" zarafatına Baş nazir gülümsəyərək əlləri ilə sinə işarəsi göstərib.

Müsahibə yayımlandıqdan dərhal sonra Baş nazir müxalifət və hökumət rəsmiləri tərəfindən kəskin tənqid atəşinə tutulub.

Artan siyasi təzyiqlərdən sonra bazar ertəsi səhər saatlarında Baş nazir rəsmi bir cümləlik bəyanat yayaraq, "Səsləndirdiyim fikirlərə görə birmənalı şəkildə üzr istəyirəm," - deyə vurğulayıb.

• "Danışıram ulduzlara, bir səs vermirlər..." - Yapon şairdən haykular
• Məni gözləyirlər - Yeni hekayə
• Bredli Kuper yeni "G.I. Joe" filminin baş rolunu canlandıracaq