Avstriyanın paytaxtı Vyana 2026-cı ilin may ayında 70-ci "Avroviziya" mahnı müsabiqəsinə ev sahibliyi etməyə hazırlaşır. Bu hüququ ölkəyə 2025-ci ildə "Wasted Love" adlı opera-balladası ilə qalib gələn müğənni JJ qazandırıb.

Kulis.az xəbər verir ki, builki yarışma həm texnoloji yenilikləri, həm də siyasi boykot dalğası ilə yadda qalacaq.

"Avroviziya-2026"da ümumilikdə 35 ölkənin nümayəndəsi iştirak edəcək. Lakin İsrailin müsabiqəyə buraxılmasına etiraz olaraq beş ölkə — İslandiya, İrlandiya, Niderland, Sloveniya və İspaniya yarışı boykot etmək qərarına gəlib.

Qeyd edək ki, müsabiqəni maliyyələşdirən "Böyük beşlik" ölkələrindən biri olan İspaniya əslində, Böyük Britaniya, İtaliya, Fransa, Almaniya və ötənilki qalib Avstriya ilə birlikdə birbaşa finala vəsiqə qazanmalı idi.

Avropa Yayım Birliyi (EBU) tərəfindən təşkil olunan müsabiqənin dəyişməz qaydaları builki iştirakçılar üçün də keçərlidir:

Mahnı müddəti: Kompozisiyalar orijinal olmalı və 3 dəqiqədən artıq çəkməməlidir.

İfa tərzi: Canlı ifa mütləqdir; fonoqram və "auto-tune"dan istifadə qadağandır.

Səhnə limiti: Səhnədə rəqqaslar da daxil olmaqla maksimum 6 nəfər ola bilər.

Tarix məhdudiyyəti: Təqdim olunan mahnılar 2025-ci il sentyabrın 1-dən əvvəl yayımlanmamalıdır.

Maraqlıdır ki, Avstraliya 2015-ci ildən bəri hər il müsabiqəyə dəvət olunsa da, qalib gələcəyi təqdirdə yarışmaya ev sahibliyi edə bilməz. İsrail isə 1973-cü ildən bəri EBU üzvü olduğu üçün yarışmada iştirak edir. Rusiya isə Ukraynaya müdaxiləsi səbəbindən 2022-ci ildən bəri müsabiqədən kənarlaşdırılıb.

• “Dünyanı ağıllı adamlardan qorumaq lazımdır” - Seyran Səxavət
• “Namiq Dəlidağlı - Sözdə görünən adam” kitabı nəşr edildi
• Nəriman Həsənzadə “Heydər Əliyev” ordeni ilə təltif edildi