“APA Media Group”un layihəsi olan APA Jurnalist Məktəbi bu gündən növbəti təlim kursuna start verib.

APA xəbər verir ki, məktəbin təlimçiləri Əməkdar jurnalist Qabil Abbasoğlu və Azərbaycan Televiziyası (AzTV) Akademiyasının prorektoru, Media və İnformasiya Savadlılığı mərkəzinin rəhbəri, Ph.D Almaz Mahmuddur.

Jurnalistikanı öyrənmək istəyənlər üçün imkan

“APA Media Group”un Baş redaktoru Nurşən Quliyev qeyd edib ki, məktəbi təşkil etməkdə əsas məqsəd jurnalistikanın sirlərini öyrənmək istəyənlərə imkan yaratmaqdır:

“Əvvəlki təlim kursunda özünü təsdiqləmiş tələbələrin bir neçəsi hazırda “APA Media Group”la əməkdaşlıq edir. Biz tələbələrə təlim keçmək, bacarıqlarını formalaşdırmaqla yanaşı, iş imkanı da yaradırıq. Əsas vəzifə sizin üzərinizə düşür. Nə qədər nizam-intizamlı olsanız, təlimlərdə davamlı iştirak etsəniz, daha çox şey öyrənəcəksiniz. Təlimin nəzəri və praktik tərəfləri var. Öyrənmək, bilik və bacarıqlarınızı inkişaf etdirmək üçün hər cür şərait yaradılıb. Yekunda kursu bitirənlərə sertifikat təqdim olunacaq. Bu sertifikat sizin bioqrafiyanızda mühüm rol oynayacaq. Bizim təlimləri bitirib başqa media qurumlarda çalışanlar da var. Təlimlərə ciddi yanaşmağınız lazımdır. Bu, inkişafınız və karyera qura bilməyiniz üçün vacibdir. Onu da qeyd edim ki, media sahəsində tanınmış mütəxəssislər də təlimə cəlb olunacaqlar, bilik və bacarıqlarını sizinlə bölüşəcəklər”.

Praktiki tədris və iş imkanları

Qabil Abbasoğlu isə qeyd edib ki, APA Jurnalist Məktəbinin ötən təlim kursunu bitirənlərin 45 faizi müxtəlif media qurumlarında işlə təmin olunub: “Məktəbi yaratmaqda məqsədimiz sizi real jurnalistikanın özü ilə tanış etməkdir. Birinci dərsimiz nəzəridir, yəni jurnalistikaya girişdir, tanışlıq məqsədi daşıyır. Diqqətinizə çatdırım ki, burada əsl redaksiya mühiti yaranacaq, real proseslər əsasında xəbərlər, reportajlar hazırlayacaqsınız”.

Qabil Abbasoğlu bildirib ki, budəfəki kursa 186 nəfər müraciət edib: “Onların içindən siz seçilmisiniz. Təlim prosesində davamiyyətə əməl edib məsuliyyətli olmaq lazımdır. Jurnalist olmaq istəyirsinizsə, bizi çox çətin, ciddi, eləcə də maraqlı dövr gözləyir. Jurnalistika sahəsində önəmli addım atacaqsınız. Bu şəraiti yaratdığı üçün “APA Media Group”a təşəkkür edirik”.

Qısamüddətli məktəblər universitetlərlə müqayisə olunur

Almaz Mahmud APA Jurnalist Məktəbinin yaranmasının çox gözəl təşəbbüs olduğunu bildirib: “Çox sevinirəm ki, APA Jurnalist Məktəbi yaranıb. Əvvəl deyirdilər, dörd illik bakalavr jurnalistikanı öyrənməyə bəs edir. Ancaq indi deyirlər, üç-dörd aylıq məktəb olsa, bəsdir. Artıq belə məktəblər universitetlərlə müqayisə olunur. Onlardan biri də APA Jurnalist Məktəbidir”.

APA Jurnalist Məktəbi

Qeyd edək ki, APA Jurnalist Məktəbi ötən ilin noyabrında fəaliyyətə başlayıb. 3 ay davam edən təlim kursuna 26 nəfər seçilib, 21 nəfər məktəbin məzunu olub.

Xatırladaq ki, təlimlər həftədə 3 dəfə müəyyən olunmuş proqram üzrə aparılacaq. APA Jurnalist Məktəbində daimi təlimçilərlə yanaşı, hər həftə tanınmış jurnalistlər, blogerlər, yeni media mütəxəssisləri təlim iştirakçıları ilə öz təcrübələrini bölüşəcəklər.

• Ağsaqqal - Qulman Oçilovun hekayəsi Aygün Əzizin tərcüməsində
• “Paris Fashion Week” həftəsində Azərbaycan modasının milli ruhu
• Romanına görə ABŞ-da qanun qəbul edilən Pulitserli yazıçı kim idi?