"Fortitude" casus filminin rejissoru və prodüserləri nümayiş olunmamış ekran işinin master-nüsxəsinin itirilməsində günahlandıraraq "Netflix" striminq xidmətinə qarşı 105 milyon dollarlıq iddia qaldırıblar.

Kulis.az xəbər verir ki, bu barədə "CBS News" məlumat yayıb.

Prodüserlərdən biri potensial alıcıya göstərilməsi üçün filmin şifrələnməmiş master-nüsxəsini diskdə şəxsən "Netflix" əməkdaşlarına təqdim edib. Bununla yanaşı, xidmət nümayəndələrinə baxışdan dərhal sonra bütün faylları silmək təlimatı verilib. Lakin qısa müddət sonra "Netflix"in icraçı direktoru işçilərin masalarının üstündəki disklərin ofisdən oğurlandığını bildirib.

Filmin yaradıcıları master-nüsxənin itirilməsinin layihənin gələcəyini təhlükə altına aldığını iddia edirlər. Onların fikrincə, studiyalar pirat versiyanın açıq çıxışda peyda olacağından ehtiyat edərək filmin hüquqlarını almaqdan imtina edə bilərlər. İddiaçılar hesab edirlər ki, eksklüzivliyin itirilməsi filmin bazar dəyərini əhəmiyyətli dərəcədə aşağı salıb.

"Fortitude" filmi yeddi ildən çox müddətə ərsəyə gəlib və 45 milyon dollara başa gəlib. Film İkinci Dünya müharibəsi dövründə müttəfiqlərin "Operation Fortitude" kod adlı gizli əməliyyatından bəhs edir. Rolları Nikolas Keyc, Ben Kinqsli, Ron Perlman və başqaları canlandırıblar.

Qeyd edək ki, may ayında Nikolas Keyc bildirmişdi ki, rejissorlar Kristofer Nolan, Vudi Allen və Pol Tomas Anderson onların filmlərindəki rollardan imtina etdikdən sonra onu öz layihələrinə dəvət etməyi dayandırıblar. Aktyorun sözlərinə görə, Devid O. Rassel ("Amerikansayağı kələk") imtinadan sonra ona yenidən müraciət edən yeganə rejissor olub.

Nikolas Keyc kimdir?

Nikolas Keyc 7 yanvar 1964-cü ildə anadan olmuş amerikalı aktyor, kinorejissor və prodüserdir. Əsl adı Nikolas Kim Koppoladır və məşhur rejissor Frensis Ford Koppolanın qardaşı oğludur. Karyerası ərzində "Las-Veqası tərk edərkən" (Leaving Las Vegas), "Milli xəzinə" (National Treasure), "Ruh sürücü" (Ghost Rider) və "Üz-üzə" (Face/Off) kimi onlarla populyar filmdə rol alıb. 1996-cı ildə "Las-Veqası tərk edərkən" filmində canlandırdığı alkoqolik yazıçı roluna görə "Ən yaxşı aktyor" nominasiyasında "Oskar" mükafatına layiq görülüb.

• Fələstin dəstəkçisi yazıçı Salli Runi kitablarını Britaniyaya göndərməyəcək
• "Yenə görüşəcəyik gələn ildə..." - Anar
• Leyla Əliyeva və Arzu Əliyeva “Cənnətin ariyası” layihəsi çərçivəsində konsertdə