Rusiya Kino Fondunun pitçinq tədbirində prodüser Anton Malışev məşhur rusiyalı reper Haskinin dahi rus şair Mixail Lermontov obrazını canlandıracağını açıqlayıb.

Kulis.az xəbər verir ki, bu barədə "BK media" portalı məlumat yayıb.

Layihənin rejissoru Pavel Lunqindir. O da öz növbəsində reperin baş rola təsdiqləndiyini qeyd edib.

Milyonluq büdcə və premyera tarixi

Tarixi bioqrafik filmin ümumi büdcəsi 600 milyon rubl təşkil edir. Bunun 150 milyon rublu artıq ayrılıb. Pitçinq zamanı Malışev əlavə 150 milyon rubl da tələb edərək komandanın dövlət vəsaitinə necə həssaslıqla yanaşdığını xüsusi vurğulayıb. Ekran işinin 2028-ci ilin yayında nümayiş olunması planlaşdırılır.

Layihədə reperin canlandıracağı Lermontov obrazı belə təsvir olunur:

"Gənc, iddialı, aşiq şair və zabit, daha sonra — Peterburq zadəgan salonlarının parlayan ulduzu, finalda isə — Qafqazda "ümidsizlər bölüyünün" rəhbəri, cəsur döyüşçü".

Reperin digər böyük kino layihəsi

Qeyd edək ki, aprel ayında "The Flow" nəşri Haskinin Aleksandr Petrovla birlikdə "Kommersant" filmində çəkildiyini də xəbər vermişdi. Sözügedən ekran işi Andrey Rubanovun "Əkin, və o böyüyəcək" romanının ekranlaşdırmasıdır. Maraqlıdır ki, əsərin orijinalında Haskinin canlandırdığı qəhrəmanın adı digər məşhur reper Slava KPSS-dir. Lakin bu adın kino adaptasiyasında tam olaraq saxlanılıb-saxlanılmayacağı hələlik məlum deyil.

"Kommersant" layihəsi böyük bir maliyyə fırıldağından sonra həbsxanaya düşən gənc bankirin hekayəsindən bəhs edir.

Rejissorlar: Fyodor və Nikita Kravçuk.

Aktyor heyəti: Aleksandr Petrov, Yelizaveta Bazıkina, Mixail Troynik, Artur İvanov, İvan Fominov, Nikita Pavlenko və Aleksandr Kudin

• Dövlət Uşaq Filarmoniyasında “Nağıllar aləminə səyahət”
• "Yenə əzəlkidir, baxışın, səsin..." - Anna Axmatovanın şeirləri
• Elçinin "Cəhənnəm sakinləri" yeni təqdimatda