Avstraliyalı rejissor Maykl Şanksın "Together" filmi Çində ciddi mübahisələrə səbəb olub.

Kulis.az xəbər verir ki, səbəb filmin ekranlara çıxan versiyasında eyni cinsdən olan cütlüyün süni yolla heteroseksual cütlüyə çevrilməsidir.

Tamaşaçılar yalnız sosial şəbəkələrdə yayılan orijinal kadrlarla müqayisədən sonra filmdə dəyişikliklərin aparıldığını başa düşüblər.

Filmin rəsmi nümayişi 19 sentyabr üçün nəzərdə tutulsa da, indiyədək kinoteatrlarda göstərilməyib. Ekran əsərinin qlobal distribütoru olan "Neon" şirkəti açıqlama yayaraq bu dəyişiklikləri “qanunsuz və icazəsiz” adlandırıb və tərəfdaşı "Hishow"dan dərhal nümayişi dayandırmağı tələb edib.

Hansı dəyişikliklər edilib?

Baş qəhrəmanın çılpaq göründüyü duş səhnəsinə əlavə buxar effekti salınıb.

Ən çox narazılıq doğuran isə homoseksual cütlüyün olduğu səhnənin dəyişdirilməsi olub: kişi siması süni intellektlə qadın üzü ilə əvəz edilib.

Filmdə eynicinsli münasibətlərə dair bəzi dialoqlar da tamamilə çıxarılıb.

Çin sosial platforması "Douban"da tamaşaçılar sərt etirazlarını bildiriblər:

“Bu, sadəcə montaj deyil, təhrif və saxtalaşdırmadır.”

“Onlar təkcə süjeti dəyişməyiblər, obrazın cinsi orientasiyasına da hörmətsizlik ediblər.”

Hazırda filmin "Douban"da reytinqi 6,9-dur.

Qeyd edək ki, Çin uzun müddətdir LGBT məzmununa senzura tətbiq edir. Ölkədə eynicinsli nikah tanınmır, bu mövzu isə ictimai müzakirələrdə tabu sayılır. Son vaxtlar senzura məqsədilə süni intellektdən də istifadə olunur. Məsələn, “Oppenheimer” filmində Florens Pyunun çılpaq səhnəsi Çin kinoteatrlarında süni intellekt vasitəsilə qara paltarla əvəz edilmişdi.

Bundan əlavə, fevral ayından bəri ölkədə azı 30 nəfər homoseksual məzmunlu erotik hekayələr yazdığı üçün həbs edilib.

• Məşhur reper Lermontovu oynayacaq
• “TEAS Press”in keçirdiyi gənclərin roman müsabiqəsinin qalibləri mükafatlandırıldı
• "Xatirə və gerçəklik arasında incə sərhəd..." - "Torpağın ruhu" oxucuya nə deyir?