Azərbaycan Respublikasının Kino Agentliyinin (ARKA) 2025-ci il üzrə “Dövlət dəstəyi ilə istehsal ediləcək film layihələri” müsabiqəsinin 1-ci mərhələsi başa çatıb!

Kulis.az xəbər verir ki, müraciət müddəti cari ilin 15 aprel tarixindən 12 iyun tarixinədək olan müsabiqədə iştirak etmək üçün yerli və xarici şirkətlərin yüksək aktivliyi müşahidə edilib.

Belə ki, Azərbaycan Respublikasında qeydiyyatdan keçmiş və kinematoqrafiya sahəsində fəaliyyət göstərən 41 istehsalçı şirkət tərəfindən ümumilikdə 88 layihə müsabiqəyə təqdim edilib.

Onlar arasında

24 tammetrajlı bədii film,

21 qısametrajlı bədii film,

15 animasiya filmi,

14 sənədli film,

14 bədii-sənədli film

layihələri yer alıb.

Beynəlxalq müştərək istehsalı planlaşdırılan 9 layihədə Türkiyə, Macarıstan, Serbiya, Gürcüstan, Koreya, Pakistan, Hindistan, Finlandiya, Estoniya, Qazaxıstan, Çex Respublikası olmaqla ümumilikdə 11 xarici ölkədən olan prodüser mərkəzinin iştirakı nəzərdə tutulur.

Müsabiqənin 2-ci mərhələsində müvafiq sahədə fəaliyyət göstərən müstəqil mütəxəssislərdən təşkil edilmiş Seçim Komissiyası tərəfindən, təqdim edilmiş sənədlərin təhlili və yoxlanılması, ssenarilərin bədii qiymətləndirilməsi və iqtisadi göstəricilərin dəyərləndirilməsi həyata keçiriləcək.

Qeyd edək ki, müsabiqənin 2-ci mərhələsi 15 iyul 2025-ci il tarixində yekunlaşacaq.

• "Bulvarda kino axşamı" adlı yeni layihəyə start verilir
• Xalq yazıçısı Elçin: "Səməd Vurğunu "yaltaq" adlandırıb..." - Müsahibə
• Beyonsun mahnıları oğurlandı