Amerikalı aktyor, rejissor və prodüser Corc Kluni 2-12 sentyabr tarixlərində keçiriləcək Venesiya Beynəlxalq Film Festivalında "Ömür boyu nailiyyətlərə görə Qızıl Şir" mükafatı ilə təltif olunacaq.

Kulis.az xəbər verir ki, festival rəhbərliyi builki fəxri mükafatın sahibinin məhz Lido adasının daimi qonaqlarından olan Kluni olduğunu rəsmən açıqlayıb.

İllər ərzində "Netflix" istehsalı olan "Jay Kelly" də daxil olmaqla bir çox filmi ilə festivalda namizəd olan sənətçi qərara zarafatla reaksiya verib:

"Venesiyada saysız-hesabsız qeyri-adi anlar yaşamışam. Bu festival mübahisəsiz mənim ən sevdiyim məkandır və '"Qızıl Şir"ə layiq görülmək böyük imtiyazdır. Bu, böyük ehtimalla artıq yaşlaşdığım mənasına gəlir, amma mən buna da razıyam".

Festivalın direktoru Alberto Barbera ulduzun fəaliyyətini yüksək qiymətləndirərək onun müasir kinematoqrafiyadakı müstəsna rolunu xüsusi vurğulayıb.

Barberanın geniş açıqlamasından diqqətçəkən məqamlar:

Karyerasına "B" kateqoriyalı filmlər və "ER" (Təcili yardım) serialı ilə başlayan Kluni heç bir qısa yola baş vurmadan zirvəyə yüksəlib. Onun xarizması sadəcə estetikaya deyil, inandırıcılığına, sərt realizminə və dərin peşəkarlığına əsaslanır.

Barbera onun müxtəlif janrlardakı uğurlarını xatırladıb: hərbi filmlərdə ("Three Kings", "Syriana"), trillerlərdə ("Michael Clayton"), sofistik komediyalarda ("Ocean’s Eleven", "O Brother, Where Art Thou?"), elmi-fantastikada ("Gravity", "Solaris") və dramatik layihələrdə ("The Descendants", "Up In the Air", "Jay Kelly").

Kamera arxasına keçdikdən sonra çəkdiyi doqquz filmlə, xüsusilə də "Confessions of a Dangerous Mind", "Good Night, and Good Luck", "The Ides of March" və "Suburbicon" kimi iddialı ekran işləri ilə Hollivud qəliblərindən kənara çıxaraq müəllif kinosunun ən gözəl nümunələrini yaradıb.

Barbera əlavə edib ki, sənətçi eyni zamanda sosial və humanitar məsələlərə həsr olunmuş həyat tərzi onu dövrümüzün əyləncə dünyasında şəksiz lider fiqurlardan birinə çevirib.

Festival haqqında qısa məlumat

Qeyd edək ki, 83-cü Venesiya Film Festivalının tam proqramı 23 iyulda ictimaiyyətə açıqlanacaq. Builki əsas müsabiqənin münsiflər heyətinə məşhur aktrisa və rejissor Meqqi Cillenhol rəhbərlik edəcək. Münsiflər kürsüsündə həmçinin Kauter Ben Hania, Daniel Blumberq, Françesko Kazetti, Ksavye Cannoli, Şəhrbano Sadat və Conni To kimi tanınmış simalar yer alacaq.

İlin ən nüfuzlu kino hadisələrindən biri olan festival bu il 2-12 sentyabr tarixlərində baş tutacaq.

• İspaniya və Portuqaliyadakı mağaralarda qədim insan DNT-si tapıldı
• Türk Dünyası Həftəsində türk dillərinin inkişaf dinamikası müzakirə olundu
• "Hər iki yol təhlükəlidir..." - "Milçəklər kralı"ndan bir hissə