Kulis.az maraqlı və mənalı yay axşamları üçün izlənməsi tövsiyə olunan beş fərqli filmi təqdim edir.

"Oppenheimer" (2023)

Amerikalı rejissor Kristofer Nolanın imzasını daşıyan bu tarixi dram filmi atom bombasının yaradılması və onun doğurduğu mənəvi dilemmaya fokuslanır. Baş rolda Killian Mörfinin yaddaqalan çıxışı ilə seçilən “Oppenheimer” həm vizual, həm də fəlsəfi baxımdan güclü təsir bağışlayır. Film elmi nailiyyətlərin bəşəriyyətə hansı ağır nəticələrlə başa gələ biləcəyini göstərir.

"Past Lives" (2023)

Cənubi Koreya əsilli kanadalı rejissor Selin Sonqun debüt filmi olan “Past Lives” iki uşaqlıq dostunun illər sonra fərqli həyat yollarından keçərək Nyu-Yorkda yenidən görüşməsi fonunda taleyin, qərarların və keçmişin insan həyatına təsirini poetik dillə təqdim edir. Sadə, lakin dərin emosional quruluşa malik bu film 2023-cü ilin ən yaddaqalan romantik dramlarından biri hesab olunur.

"Talk to Me" (2023)

Avstraliyalı yutub fenomenləri Denni və Maykl Filippo qardaşlarının ilk tammetrajlı işi olan bu psixoloji qorxu filmi gənclərin ölülərlə ünsiyyət qurmağa çalışdığı təhlükəli bir oyunun fəsadlarını əks etdirir. Güclü vizual həll, yüksək gərginlik və real emosional oyunla seçilən “Talk to Me” müasir qorxu janrına orijinal nəfəs gətirən filmlər sırasındadır..

"Inside Out" (2015)

Bu animasiya filmi ilk baxışda uşaqlara xitab etsə də, əslində, böyüklər üçün də dərin psixoloji məna daşıyır. Hadisələr gənc bir qızın beynindəki beş əsas emosiyanın – sevinc, kədər, qorxu, qəzəb və iyrənmənin qarşılıqlı münasibəti ətrafında cərəyan edir. “Inside Out” təkcə texniki cəhətdən deyil, həm də ideya baxımından animasiya janrında bir zirvədir.

"Asteroid City" (2023)

Ues Andersonun rejissorluğu ilə ərsəyə gələn bu komediya-dram filmi 1950-ci illərin Amerikasında təşkil olunan elmi konfrans zamanı baş verən absurd və sirli hadisələri təsvir edir. Rejissorun özünəməxsus vizual estetikası, simmetrik kadrlara və teatr estetikasına yaxın üslubu, eləcə də qeyri-adi obrazlar filmi həm vizual, həm də məzmun baxımından fərqli səviyyəyə qaldırır. “Asteroid City” həm güldürür, həm də düşündürür.

• Aprelin “Ulduz”u işıq üzü gördü
• Budapeştdə Fəxrəddin Manafovla görüş təşkil olundu
• Bu gün Radio Günüdür