Kulis.az şair Qəşəm Nəcəfzadənin yeni şeirlərini təqdim edir.
Şəkil
Adam yaxınlarda yox,
Uzaqlarda şəkil çəkdirər.
Məsələn, əsgərlikdə,
Ya da 1-ci ildə...
Ya yıxılan halda
Ya qaçan vaxtı
Ya da gülən vəziyyətdə şəkil...
Elə bir şəkil ki, min il oxunub qurtara bilməsin.
Partiya biletlərnin şəklilləri sahiblərinə bənzəmirlər
Çünki onlar həyatlarında yalnız bircə dəfə o cür dayanırlar
Heç uşaqlar da tanımaz atalarını.
Partiya sədrlərinə bir təklifim var
Atalar övladları ilə
Oğlanlar sevdikləri ilə
Babalar nəvələri ilə
Şəkil çəkdirib
Vursunlar biletin birinci səhifəsinə.
Çıxıb getmək istəyirəm
Şəkil çəkdirdiyim yerə
Şəkil çəkdirdiyim aya,
Şəkil çəkdirdiyim ilə.
Onsuzda çəkdirdiyimiz bütün şəkillər bir azdan uzaq olacaq
Elə bir uzaq ki, ora hələ gedib çata bilməmişik!
Həyatım haqqında bir neçə kəlmə
Cibimdəki sənədləri metro qatarlarının təkərlərinin altına tullayıb
Gedib bir çiçəyin ləçəklərinin altında ağlamaq istəyirəm,
Qoymurlar,
Deyirlər, çiçəyi biz əkmişik.
Başımı götürüb Bakının ən ucqar kəndlərinin birində
Balaca bir koma tikmək istəyirəm
Qovurlar
Deyirlər, torpağı biz yaratmışıq.
Dənizdən balıq tutmaq istəyirəm
Hasar çəkirlər
Çimmək istəyirəm
Pul istəyirlər
Deyirlər dəniz bizimdi...
Meşədə kölgəni də satırlar...
Deyirlər bizim ağacın kölgəsidir.
İmkanları olsa havanı da balonlara doldurub satarlar
Bir dəfə nəfəs almaq 10 qəpik...
Körpələr 5 qəpik
Qocalar 3 qəpik...
Şəhid uşaqları 18 yaşına qədər pulsuz...
Allahım,
Mənə çiçək ver
Mənə meşə ver
Mənə dəniz ver
Mənə ev ver
Mənə hava ver....
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
