Şeirlər vardır, yazıldığı gündən dillərə, könüllərə düşən... İllər ötüb keçsə də yaddaşın bir küncündə, dilin ucunda qalan...İnsan yaşa dolsa da heç zaman qocalmayan, hər zaman öz estetik təravətini saxlayan, vəsf etdiyi duyğular qədər təmiz, saf və əbədi olan şeirlər... Kulis.az-ın “Günün şeiri” layihəsində bu şeirlər yada salınır. Bu ölməz şeirlərə yeni könüllər, yeni könül evləri, yeni sevgilər tapmaq üçün... Şeirləri çoxaltmaq üçün...

Sevinc Elsevər. Yoxsan

yoxsan...
o qədər dağınıq hər şey
tez-tez çayımı üstümə dağıdıram
yapışır şalvarım qıçıma
yanıram, yanıram.
əlimlə qoyduğum əşyanın yerini unuduram
şərləyirəm evdəkiləri
axırda özüm tapıram
yarıyadək oxuduğum kitabları
başdan başlayıram
pişiyimə kök
dovşanıma ət verirəm
sənin yerinə
müdirimə zəng edirəm...
bilgisayarımın yaddaşından
lazımlı faylı
çaşıb silirəm
evdə işıqları yanılı
suyu açıq buraxıram
deyinir anam
ayaqyolunda suyu çəkməyi unuduram
deyinir anam
bir saatın içində
üç dəfə soruşuram
ayın tarixini
marketlərdə pulu artıq verirəm
avtobusdan pulsuz enirəm
unuduram dişlərimi fırçalamağı
tərs geyinirəm köynəyimi
işim düz gəlmir
o qədər dağınıq hər şey...
yoxsan...

• Tanınmış pianoçular konsert proqramı ilə çıxış edəcəklər
• Bir məmurun dilindən - Qorxmaz Şıxalıoğlu
• Rəhilə Həsənova vəfat etdi