Kulis.az “Cənab leytenant”, “İgid əsgər, möhkəm dayan” mahnılarının sözlərini yazan Şahin Musaoğlunun şeirlərini təqdim edir.

-1-

Vətən

Vətən-ünvanı zamanlar

və mövsümlər

üzərində dayanan

qos-qocaman yurd yeri.

- babamın ayaq səsləri

- nənəmin nağıl dünyası

- atamın həniri, nəfəsi

- anamın laylası...

Qoxusu neft dadır

- havasının yağışı,

yağmuru, günəşi, qarı

bir də sərt

rüzgarı vardır.

Rəsmini çək desələr

ay-ulduzlu bayrağımı

çəkərəm.

Tərifini sorsalar

-deyərəm: “ dünyaya gəldiyim, Vətən,

dərdindən öldüyüm - Vətən ”

-2-

Boyasız, qələmsiz, bəzəksiz...

Boyasız çəkilir dənizə

- günəşin şəfəqi

- boyasız.

üzlərə-təbəssüm,

çöhrələrə-nur,

aynalara sürəti gözəlliyin

- boyasız çəkilir.

Qələmsiz yazılır alına

- yazılan yazılar,

- qələmsiz

yaddaşa-xatirələr,

ürəyə-sevgi,

- gözlərə-sirli gizlinlərin,

- qələmsiz yazılır.

Bəzəksiz-düzəksiz yazılır həyat

kiminə qos-qoca bir roman,

kiminə suya yazılan şeir kimi

- yazılır həyat

bəzəksiz-düzəksiz yazılır həyat..

-3-

Payız

Yay getmiş... və

hər yan bitmiş

bir fəslin üzüntüsündə

təlaş və həyəcan

-asılıb havadan.

Keyfi çəkilən yayın

dadı damağında

-qızılı yarpaqların.

Bir azdan-

Quşların festivalı başlayacaq.

Amma qayğısız qumruların

Dimdiyi

Yemsiz günlərin gəlişindən

Xəbərsizdi-hələ

Küləklərin yarpaqlara

Tutacağı “divandan “

əsl “qətliamdan” –

xəbərsizdi ağaclar...

gedən günəş dönəcək

günə düzən verəcək

göy-yağan yağışları

yığacaq başına

qulaqlarda səs salacaq

damcılar:

-vida nəğməsi oxuya-oxuya...

Gün işığı yerini dəyişəcək

yavaş-yavaş və

köç başlayacaq!

Sərçələrdən savayı

Bir quş qalmayacaq

- buralarda...

Bu yerlərin sahibi

- olacaq sərçələr

sahib olduğunu anlamasalar da

uça-uça qanadlarını sevəcəklər

sevə-sevə adlarını...

“qanadlı olmaq gözəl,

quş olmaq yaşamaq üçün yetər”

- deyib atacaq özünü yarpaqlar

asıldıqları yerdən...

Təbil səsləri gələcək

- dəniz tərəfdən.

səhər...

- azan oxunan vaxtı

təslim olacaq Şəhər

Təslim olacaq Payıza

-4-

Elan - sahibindən, yaxud

“Без посредников”

Ötüb keçdi o günlər,

o toylar o düyünlər...

Savablarım heç oldu,

günahlarım iç oldu.

Paylaşdım nə vardısa,

üzülüşdüm bir təhər

Olan, oldu...

qalan qaldı geridə

Ümid də yox oduna

- qızınam istisində.

İndi bu yaşımda mən

axtarış həvəsində...

O vaxt ki, dostlar hanı ?!

heç olmasa birinin,

əlini sıxaydım kaş

“Tarqovı küçəsində...”

- köhnə görüş yerini

icarəyə verirəm...

-5-

Nə var,nə yox?!

“biri vardı, biri də... itmişdi”

3 yaşlı Ziyanın dediklərindən.

Həyatın rəngi sarıdı,

Ömür – ölümə sarıdır...

Hər “yox”-un, “yoxdan” varıdı

- nə var, nə yox ?!

Əlim əlinə çatacaq,

Adım dilinə yatacaq...

Yuxum gözünü tapacaq;

- nə ac, nə tox ?!

Yol gedib yolu gətirər,

Boz bulud – dolu gətirər

Verən əl dolu gətirər;

- nə az, nə çox ?!

• “Regiona böyük töhfə - Hophopnamə” Kitab Mərkəzinin təqdimatı keçirildi
• “Sənətkarın dostu” layihəsi çərçivəsində növbəti görüş oldu
• "Batman" kimi yaşayan adam