Dünyaca məşhur Kolumbiya yazıçısı Qabriel Qarsia Markesin “Yüz il tənhalıqda” romanının ilk nəşrlərindən biri oğurlanıb.
Kulisin onedio.com-a istinadən verdiyi xəbərə görə, Markesin imzası olan kitab həftəsonu Kolumbiyanın paytaxtı Boqotadakı Beynəlxalq Kitab Sərgisində oğurlanıb.
Sözügedən kitab Korferias Sərgi Mərkəzində kilidli bir dolabda sərgilənirdi. Polis sərgi mərkəzindəki kameralardan oğrunu və ya oğruları tapmağa çalışır.
Kitabın sahibi Alvaro Kastillo 1967-ci ildə nəşr olunmuş əsərə 60 min dollar qiymət qoyulduğunu söyləyib.
Kastilio Uruqvayın paytaxtı Montevideodakı bukinistdən aldığı kitaba məşhur yazıçının “Köhnə kitablar satan Alvaro Kastilioya. Keçmişdən əbədiyyətə qədər hər zaman dostum olaraq qalacaqsan. Qabo” yazıb imzaladığını bildirib. Kastilio kitabın onun üçün qiymətsiz olduğunu söyləyib.
Latın Amerikasının ən böyük kitab sərgilərindən olan Boqota Kitab Sərgisi bu il “Yüz il tənhalıqda” adı keçən xəyali Makonda kəndinə ithaf olunmuşdu. Sərgi bu günlərdə başa çatacaq.
Xatırladaq ki, “Qabo” ləqəbli Markesin arxivini Texas Universitetinin Harry Ransom Mərkəzi 2,2 milyon dollara almışdı.
Latın Amerikasının magik dünyasını qələmə alan əsərlərinə görə, 1982-ci ildə Nobel Ədəbiyyat mükafatına layiq görülən Markes Servantesdən sonra ən böyük ispandilli yazıçı hesab olunur. Məşhur yazıçı 2014-cü il, aprelin 17-də vəfat etmişdir.
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
