Kulis.Az gənc şairə Leyla Nənənin yeni şeirlərini təqdim edir.

Adam corabının qoxusuyla necə doğmalaşarsa –

tək olar, kefsiz olar,

elə evə gəldiyi kimi də corablarıyla yatarsa günlərlə

bax, elə doğmalaşmışdın mənə,

corablarım kimi

tək idim, kefsiz idim,

elə gördüyüm kimi də öyrəşmişdim sənə

daha çox, daha çox istəyirdim

eşidib görməyi,

getdiyin yollarla getdim, danışdığın yerlərə getdim

görüb eşitmək üçün

amma mən oralara çatanda, sən artıq

get

miş

din.

Hətta bir dəfə

avtobusla getdin

qaçıb minmək istədim

qapılar bağlandı, heç nə yox, kaş pəncərə tərəfə oturardın

axmaq kimi gedib ortada ayaq üstə dayandın

tfu sənə!

mənsə velosipedlə yolun ortasında

arxada

qaldım

görmədin

***

Adamın içi sızlayar ha,

burnunun ucu göynəyər

boğazı ağırlaşar – rahat udquna bilmək üçün

mübarizə aparar, gözləri yaşarar ha,

necə deyim - kirpikləri nəm olar

yuxuya doymayan körpə kimi,

ad verməyə çalışar ha halına – mən deyim ''həsrətli''

sən de ''küskün, təlaşlı, qorxaq''

və sairə və bənzəri,

eləyəm indi, əzizim, eləyəm.

bəs sən, sən necəsən?

mən deyim "yaxşı", sən de, ''sənin kimi''

heç olmasa halıma "tənha" adı verməyim.

***

Anam nənəmi çimizdirirdi

birinci suyu tökürdü,

sabunlayırdı,

sonra su tökürdü yenə

köpüklü su tökülürdü nənəmin

büzüşmüş dəriylə örtülmüş kürəyindən

dərisinin içindəki nənəm

halsız idi,

bədənindən süzülən köpüklər kimi.

sonra kisələyirdi nənəmi anam,

bədənindən çirki tökülürdü dənə-dənə

ömrü kimi.

Sonra nənəm öldü,

kisə qurudu,

su kəsildi...

Yenə su gəlir bizə,

anam çimmək istəyir...

• Ayaqlarını don vuran, həkimlərin aldatdığı Xalq artisti
• Plastik əməliyyat, ayfon, kredit və əxlaqsızlıq
• Sabah olmayacaq... - ADNA faciəsi qurbanlarının xatirəsinə