"C.C Literary Agency" adlı sənət agentliyi fəaliyyətə başlayıb.

Agentliyin rəhbəri yazıçı Cəlil Cavanşirdir.

Kulis.az Cəlil Cavanşirin agentliyin fəaliyyət istiqaməti, məqsədi, vəzifələri haqqında yazısını təqdim edir.

Uzun illərdir nəşriyyatlarla redaktor, tərcüməçi, layihə rəhbəri kimi əməkdaşlıq edirəm. Eyni zamanda “Qanun” Nəşrlər Evinin təşəbbüsü ilə keçirilən “Milli Kitab Sərgi”lərində təşkilatçılardan biri olmuşam.

Redaktor, tərcüməçi və təşkilatçı kimi ciddi təcrübəm var.

Nəşriyyatlarla peşəkar əməkdaşlığım hələ də davam edir.

Onlarla yerli yazıçının və şairin kitabının çapında təşəbbüs göstərmişəm, onlarla şair və yazıçımızın kitabının redaktoruyam. Bacardığım qədər nəşriyyatlarla yazarlar, tərcüməçilər, redaktorlar arasında vasitəçilik etmişəm.

"C.C Literary Agency"-nin də əsas məqsədi bu vaxtacan gördüyüm işləri peşəkar xidmətə çevirməkdir. Eyni zamanda xarici nəşriyyatlarla da əməkdaşlıqlarımızı yerli yazarlarımızın fürsətinə çevirəcəyik.

"C.C Literary Agency" Azərbaycanda ilk peşəkar "ədəbi agent" xidməti göstərən qurum olacaq. Müəlliflərə kitabın hazırlıq prosesinə, redaktəsinə, tərcüməsinə, nəşrinə, satışına, reklamına, marketinqinə dəstək göstərməyi planlaşdırırıq.

Naşirlərlə müəlliflər arasındakı peşəkar münasibətləri tənzimləmək istəyirik. Yazıçılarımızın müəllif hüquqları məsələsində peşəkar dəstəyə ehtiyacı var. Xidmətlərimiz əsasən üç istiqamətdə olacaq:

I - Kitab nəşri və kitabların çapa hazırlanması - Yazıçı və şairlərin kitablarının yerli və xarici nəşriyyatlarda nəşri (Müəlliflər və nəşriyyatlar arasında peşəkar vasitəçilik.) - Əsərlərin peşəkar redaktəsi və korrektəsi. Kitabların peşəkar tərcüməçilər tərəfindən xarici dillərə tərcüməsi

II - Kino və dramaturgiya - Yazıçı, dramaturq və ssenaristlərin əsərlərinin teatr və kino prodüserlərinə təqdim edilməsi. Əsərlərin əsasında ssenarinin yazılması. Peşəkar kino və reklam ssenarilərinin yazılması, kopirayter (copywriter) xidməti - videoçəkiliş və montaj xidməti. Prodüser xidməti

III - Audiovizual xidmət, marketinq və PR - Audio-kitabların peşəkar aktyorlar tərəfindən səsləndirilməsi. Kitab satışının, marketinq və PR işlərinin təşkili. Wikipedia səhifələrinin hazırlanması və idarə edilməsi.

Göstərəcəyimiz bütün xidmətlər bu günə qədər göstərdiyim və dərindən bildiyim sahələrə aid olduğu üçün, bu işi daha peşəkar şəkildə görə biləcəyimizə inanıram. Hələki çox kiçik bir komanda ilə, büdcəsiz işə başladığımız üçün, addım-addım irəliləməyi düşünürük. Təbii ki, həm maliyyə dəstəyinə, həm də dostların mənəvi dəstəyinə ehtiyacımız var. Ancaq əsas hədəfimiz öz bacarığımızla, öz gücümüzə irəliləməkdir. Gələcəkdə komandamızı genişləndirib, peşəkar redaktor, tərcüməçi, korrektor, ssenarist və kopirayterlərlə işləməyi planlaşdırırıq. Qısa müddətdə komandamızın genişlənəcəyinə və imkanlarımızın böyüyəcəyinə inanıram.

• Müğənni Conidə nadir genetik xəstəlik aşkarlandı
• Ahmet Bican Ercilasun: "Gülçöhrə və Əsgər"i izləmək belə Azərbaycanı qorumaq üçün yetərli səbəbdir..."
• 18 oktyabr - Müstəqillyin Bərpası Günüdür