news-inner
clock15:11 calendar-gray 19 Yanvar 2021 view-gray5408 dəfə oxunub
view-gray5408 dəfə oxunub

“Mən xəbərləri oxuyanda qarşımda avtomatlı əsgər dayanmışdı” - Məşhur diktor 19 yanvar gecəsi AzTV-də baş verənlərdən danışır – Müsahibə

Düz 31 il əvvəl bu gecə - 1990-cı il yanvarın 19-dan 20-ə keçən gecə Azərbaycan tarixinə qara hərflərlə yazılmış "20 yanvar" faciəsi baş verib. Həmin gecə Azərbaycan Televiziyası xalqın ümid yeri idi. Kulis.az faciə baş verən gecə efirdə olan Azərbaycan Televiziyasının məşhur diktoru Tamilla Ələkbərova ilə müsahibəni təqdim edir. Diktor həmin gecə televiziyada baş verənlər barədə danışır.

- Tamella xanım, 1990-cı il yanvarın 19-dan 20-nə keçən gecənin canlı şahidlərindən birisiniz. Həmin günlər sizin xatirinizdə necə qalıb?

- Biz Salyan kazarması deyilən yerin yaxınlığında xəstəxana ilə üz-üzə yaşayırdıq. Hadisə vaxtı şəhərə daxil olan əsgərlər ata-ata gedirdilər. Onlar üçün silahların hara və kimə dəyməsinin əhəmiyyəti yox idi. Yadıma gəlir ki, qızım hadisə vaxtı başını pəncərədən çölə çıxarmaq istəyəndə, onu tez çəkib yerə salmışdım. Səhəri gün bizim eyvanın altında vurulan insanların qanından gölməçələr yaranmışdı. Onların qanı bir ay qurumadı.

- Hadisə baş verəndə siz televiziyada idiniz?

- Bəli. O zaman Xalq cəbhəsinin adamları televiziyaya gəlib bizə dedilər ki, çıxın. Biz hamımız otaqdan çıxarkən bir az ləngidik, amma çıxdıq. Kütləyə qoşulub bir az gedəndən sonra yenidən televiziyaya qayıdıb diktorlar otağına yığışdıq. Bundan sonra rəhmətlik yoldaşım gəlib bizi apardı. O vaxtı mənim yanımda Nərgiz (Nərgiz Cəlilova red.) və başqa diktorlar var idi. Həmin gecə də ruslar televiziyanın enerji blokunu partlatdılar.

- Bildiyimə görə siz həmin vaxt studiyada olmusunuz və xəbərləri oxumusunuz. Zəhmət olmasa, bir az bu barədə danışardınız.

- Bilirsiniz, qızım, mən o dövrdə çox şey görmüşəm. Rəhmətlik Salatın Əsgərova bizim ailəyə yaxın insan idi, mənim qızımla dostluq edirdilər. O, gecə ilə Ağdama gedəndə mənə zəng vurub dedi ki, Tamella xanım, mən gedirəm. Ona dedim ki, ay qızım, balaca körpə uşağın var, getmə xahiş edirəm. Dedi, yox, mən getməyim, o birisi getməsin, bəs kim getsin? Gedim, hər şeyi öz gözümlə görüb yazım. Getdi, şəhid oldu... İndi qayıdıram sənin sualına. Televiziyanın enerji blokunu partlatmazdan əvvəl mən xəbərləri oxuyanda mənimlə üzbəüz bir yekəpər soldat dayanmışdı. İndi də yadıma düşəndə qəhərlənirəm (kövrəlir). O, kameranın yanında əlində avtomat dayanıb diqqətlə mənə baxırdı, avtomatı da düz mənə doğru tuşlamışdı. Ona icazə vermişdilər ki, əgər onların əleyhinə mənim ağzımdan nə isə artıq əskik bir söz çıxsa, yerimdəcə məni öldürsün. Həmin vaxt bir Allah bilir ki, mən o xəbərləri necə titrəyə-titrəyə oxuyub studiyadan çıxdım. Ondan sonra enerji bloku partladıldı. Binanın bütün mərtəbələrində qışqırıq, hay-həşir qopdu. Adamlar bir-birinə dəydilər.

- Həmin vaxt ilk kiminlə əlaqə saxlaya bildiniz?

- Bütün telefon xətlərini kəsmişdilər. Heç kimlə əlaqə saxlamaq mümkün deyildi. Yoldaşım qaranlıqda qorxa-qorxa gəldi ki, tez məni ordan aparsın. O vaxtı küçələrdə gəzmək olmurdu. Mən indi yenidən o günlərə qayıtdım və çox pis oldum. Ömrümün böyük bir hissəsi gedib, amma ölənə qədər həmin günləri unutmayacam. Bu hadisələr başqa ölkələrdə olsaydı, bütün dünyaya car çəkərdilər. Allah Heydər Əliyevə rəhmət eləsin. O vaxtı diaspora, filan yox idi. Heydər Əliyev Moskvada yaşayan azərbaycanlıları başına yığdı, xalqa müraciət elədi, insanları sakitləşdirdi. Heydər Əliyev Bakıya qayıdandan sonra da ondan ilk müsahibəni mən götürdüm. Onunla şəkilm də var.

- Efir partladılandan sonra nə qədər müddət efirə çıxa bilmədiniz?

- İşə tez-tez zəng vururdum. Artıq müəyyən enerji xəttini bərpa edib quraşdırmışdılar. Amma bizi işə getməyə qoymurdular. Deyirdilər, biz istədiyimizi onsuz da hələ çatdıra bilmirik. Əslində açıq danışmağa hamımız qorxurduq, çünki hər şey nəzarət altında idi. Kim nə deyir, danışır hər şeyə qulaq asırdılar. Ona görə də işçilər bizi qoymurdular işə getməyə. Bir neçə gün getmədik, bu müddətdə ancaq kişi diktorlar işə çıxdılar. Rəhmətlik Sabir müəllim, Hicran müəllim, Rafiq gəldi. Bir həftədən sonra qadın diktorlar işə çıxdılar.

- Tamella xanım, bütün bu danışdıqlarınızın fonunda bir sual vermək istəyirəm. Həmin hadisələrlə bağlı heç unutmadığınız kadr hansıdır?

- Bayaq sizə dediyim kimi, hadisə baş verən gün evimizin yanından axan qanın görüntüsü heç vaxt yadımdan çıxmır, elə bil çay axırdı. Biz o zaman elə bilirdik ki, 20 yanvar şəhidləri axırıncı şəhidlərimiz olacaq. Amma elə olmadı. Biz bilmədik ki, bizim daha çox şəhidimiz hələ qarşıdadı. İndi sizinlə danışıram 19-dan 20-nə keçən gecə baş verənlər, sonra şəhidlərimizin dəfni, insanların axını kino lenti kimi gözümün qarşısından keçir. Biz heç yerə gedib çata bilmirdik, bütün yollarımız bağlanmışdı. Nə deyim, qızım, Allah bütün şəhidlərimizə rəhmət eləsin.

Oxşar xəbərlər

Xəbər lenti

Sonsuz - Şərif Ağayarın hekayəsi
17:00 11 May 2021
Filmimiz Braziliyada beynəlxalq festivalda sertifikata layiq görülüb
15:50 11 May 2021
Soljenitsının Nobel almasının gizlinləri
14:45 11 May 2021
İntəhasız acı nəğmə - Qorki haqqında esse
13:25 11 May 2021
Sevgiliyə gül uzadan əllərin tənhalığı - Ramil Əhməddən yeni şeirlər
12:00 11 May 2021
Tom Kruz mükafatlarından imtina etdi - Qalmaqal
11:30 11 May 2021
“Qarabağa sülh, sevgi və ümid” adlı xeyriyyə konserti keçiriləcək
10:26 11 May 2021
II Nikolayın qızı onun şəklini istədi, çar öz sarayına qonaqlığa çağırdı - Azərbaycanlı qaçağın film kimi həyatı
09:00 11 May 2021
Berlin Film Festivalı açıq havada keçiriləcək
17:35 10 May 2021
Musa Dədə əbədiyyət yaşında - Fərid Hüseyn yazır...
15:51 10 May 2021
Çingiz Qənizadə: “Kəramət Böyükçölü maliyyələşdirib üstümə göndərənləri yaxşı tanıyıram” – Müsahibə
14:30 10 May 2021
Leonardo da Vinçinin çəkdiyi rəsm hərraca çıxarılacaq
13:45 10 May 2021
Məşhur yazıçı vəfat etdi
12:30 10 May 2021
Allah üçün bənna kimdir? - Şəhriyar Del Gerani yazır...
11:30 10 May 2021
Türkiyəli bəstəkar Qarabağ Zəfərinə mahnı bəstələdi - Video
10:20 10 May 2021
Kimi Kreml xəstəxanasına müalicəyə göndərdi, kimi "KQB"-nin qəzəbindən qorudu? – Heydər Əliyevin ədəbiyyatımıza verdiyi töhfələr
09:30 10 May 2021
Zöhrə Abdullayeva xəstəxanaya yerləşdirildi
19:45 09 May 2021
Ədəbiyyatımızın ən gözəl müharibə şeirləri - Mətnlər
14:28 09 May 2021
9 May qələbəsində rus arağının rolu - “Tamamilə məxfi” sənədlər
10:30 09 May 2021
Paşinyan Cıdır düzündə “Yallı” gedəndə – Bircə yazır...
09:01 09 May 2021