Ramiz Rövşənin 42 il öncə yazdığı sevgi şeiri - Mətn

Ramiz Rövşənin 42 il öncə yazdığı sevgi şeiri - Mətn
27 noyabr 2019
# 10:22

Kulis.az Ramiz Rövşənin 42 il öncə yazdığı «Mən də dəyişkənəm havalar kimi» adlı sevgi şeirini təqdim edir.

Sən mənim ömrümün həyəcanısan,
bir batan gəmidən gələn SOS kimi.
Yuxusuz gecəmin lap əvvəlində
çəkdiyim sonuncu papiros kimi.

Sən mənim dərdimə dərman deyilsən,
Sən mənim dərdimi ovutduransan.
Sən mənim sevdiyim insan deyilsən,
Mənə sevdiyimi unutduransan.

Sən susuz səhraya çilənən yağış,
qaranlıq gecədə yanan çıraqsan.
Qar basmış bir çöldə yolunu azmış
yolçunun rastına çıxan ocaqsan.

Kor olan deyiləm sənin tüstünə,
yenə öz yolumu mən gedəcəyəm.
Hələlik bir azca tutub üstünə
donmuş əllərimi isidəcəyəm.

Nə yaxşı, rastıma çıxdı bu ocaq,
bu donmuş əllərim qızındı bir az.
Heyif, bu ocağın istisi ancaq
donmuş ürəyimin buzuna çatmaz.

Yox, ocaq neyləsin?.. Onda günah yox.
Günahkar varsa da, mənəm... ocaq yox.

Öz alov dilini uzadıb necə
üzümü-gözümü yalayır yazıq.
Bu ocaq sonuncu kösövünəcən,
mənimçün yanmağa hazırdı, hazır.

Burda həmişəlik qalsaydım əgər,
Özümə ev-eşik qursaydım əgər,
Sən də bu ocağın keşik çəkəni,
Evimin xanımı olsaydın əgər, -

Lap səni sevsəm də, sevməsəm də mən,
burda yaşamağa nə vardı onda.
Bir az dincələrdim özüm-özümdən,
bir rahat həyatım olardı onda.

Amma “rahat həyat” mənlik deyil ki,
mən də dəyişkənəm havalar kimi.
Odur ki, ayrılaq, sağ-salamat qal.

Yolumdan saxlama – məni yola sal.
Bəlkə də hardasa bir təzə sevgi
çıxacaq rastıma CANAVAR kimi!..

1977

# 6098 dəfə oxunub

Oxşar xəbərlər

Qalmaqallı rep qrupuna görə festivalı maliyyələşdirməkdən imtina etdilər

Qalmaqallı rep qrupuna görə festivalı maliyyələşdirməkdən imtina etdilər

10:45 12 iyul 2025
“Yeddi Gözəl”  sənət layihəsi təqdim olundu

“Yeddi Gözəl” sənət layihəsi təqdim olundu

10:13 12 iyul 2025
"Üzeyir Hacıbəyovun şəxsiyyəti mənim üçün qaranlıqdır" - Məqsədləri onu şərləyib tutdurmaq idi...

"Üzeyir Hacıbəyovun şəxsiyyəti mənim üçün qaranlıqdır" - Məqsədləri onu şərləyib tutdurmaq idi...

09:00 12 iyul 2025
Nadir Yalçına ağır itki   üz verib

Nadir Yalçına ağır itki üz verib

08:48 12 iyul 2025
Kanye Vestin iştirakına görə Rubikon Festivalı ləğv edildi

Kanye Vestin iştirakına görə Rubikon Festivalı ləğv edildi

18:37 11 iyul 2025
“Bülbülün qonaqları”  layihəsində Səməd Vurğun yad edildi

“Bülbülün qonaqları” layihəsində Səməd Vurğun yad edildi

18:30 11 iyul 2025
# # #