news-inner
clock17:31 calendar-gray 25 Sentyabr 2019 view-gray2120 dəfə oxunub
view-gray2120 dəfə oxunub

Onlar da “Bir şeir” yarışmasına qoşuldu - Yeni mətnlər

Kulis.az "Bir şeir" müsabiqəsinə göndərilən yeni şeirlərdən nümunələr təqdim edir.


Babək Quliyev

Mənə Bir Qələm Verin

Mənə bir qələm verin,
Sizə insanlığın rəsmini çizim.
İçində dolmayan böyük boşluğun,
Yerini sevgiylə, eşqlə doldurum.

Mənə bir zaman verin,
Zamanın qədrini, hökmünü bilim.
Sığmayan ömrümə o illərimi,
Sığdırım dünyanın gözəlliyini.

Nə az, nə çox - bir dünyam olsun,
Təməli sədaqət, ədalət olsun.
Bükməsin boynunu yetim uşaqlar,
Axı insanlıqda onların da payı var.

Mənə bir qələm verin,
Sizə sevgi dolu bir aləm verim.
Yazım məhəbbətdən, güldən, çiçəkdən,
Əbədi yaşayan gözəlliklərdən.

Mənə millətimin gəncliyin verin,
Onlarla vətənə gələcək verim.
Kəsməyin səsini azadlığımın,
Azad iradəmin, azad ruhumun.

Mənim duyğularım dünyadan geniş,
O qədər möhtəşəm, o qədər müthiş.
Mənə zərrə qədər bir işıq verin,
Sizə günəş boyda bir çıraq verim.


***

Bəhruz Xəlil

Doldu gözqapaqlarıma, ürəyimin ağrısı
bundan sonra az fərq edir, ağrıyırsa ağrısın.
Xoşbəxt edə bilmədiyim, indi, axı hardasan?

Gözləmək də bir iş deyil, mən də işdən qaçanam.
Düz on ildir yol gedirsən, düz on illik uzaqsan.
Getməyinə on il getdi, qayıdarsan haçana?!

Uzanmışam, başımı da söykəmişəm divara
Divarların soyuğunda baş ağrısı keyiyir.
Əllərimdə gizilti var, qollarımda qıcolma

Gözlərim də hiss edirəm, son zamanlar göynəyir.
Sinəsindən cırılmağa başlayıbdır köynəyim!

***

Beytullah Avcı

Adsız şeir

Yoxlayır azğın küləklər məsum quşların səbrini
Bağrı yaralı kəlmələrin yox artıq mərhəməti
Ağ divlər oxşayır başını buludların
Buludlar ki, incik və qırılğan
Bir istirab ki
Döyünür bir dərviş, sızıldayır bir şaman
Mütməin* bir ruhun zirvəsində

Sinəsində çaxan bir qığılcım
Yaxud da bir zəlzələdir, həsrət
Böyüyən öksüz röyalarımın

Sığınmaq,
ən tənhasında kölgəsinə səssizliyin
Cırılmış bütöv mahnıların
Səsi yitmiş bütöv ozanların
Qanadları sınmış bütöv rəsmlərin
...
İnləyir bir gecə
Fəryadından göyün
Qanayır baxışları ayın
Tökülür ovcuma qəlbimin bir-bir
Qəddar ulduzlar

Mən ki,
Köksü gülüşlə qanlanmış bir lalə düşlərəm
Sınıq oyuncağına ağlayarkən bir uşaq.

Mütməin* - şübhədən uzaq mənasında


***

Elşad Barat

And olsun zahidin barmağına

Hər dəfə günəşin batdığına baxanda,
Nəsimi düşür yadıma.
Günəşdən o yanda hardasa
Nəsimini təzədən soyurlar
Bəlkə də Nəsimini soyacaqlar deyə
Günəş batanda rəngi saralır
And olsun zahidin barmağına.

Bütün yolları ilk dəfə yol çəkənlər gedir
Dünyada elə bir şəhər tanımıram ki,
Orda adam yaşamasın
Hər kəsin gedə bilmədiyi bir yol var
Yolçəkənlər bilir
Bizdən günəşə gedən yolun yolçəkəni Nəsimidir
And olsun zahidin barmağına

Heyva ona görə gec yetişir ki
Almalar tükənsin
Çünki heyvadan şirindir alma
Ya da Nəsimini tanımır
Günəşin şüalarını ala bilmir.
And olsun zahidin barmağına...

Ultrabənövşəyi şüalar sarı olur
Nəsiminin soyulmuş rəngində
Banan soyulacağını bilib ki, sarıdır.
Qoz-fındığı vurub sındırırıq
Günahı sarı ola bilməməkdir
And olsun zahidin barmağına...

Bir kafedə oturmuşam
Sapsarı pivələr süzülür kirli bakallara
Pivənin sarılığı
Siqaretin üstündəki "sağlamlığınız üçün zərərlidir"
yazısına oxşayır
Hər dəfə qapı açılanda
Müdir dördgöz olur qapıya tərəf
Müştəridən sarı darıxır
Mən uşaq olanda elə bilirdim
Sarılıq tutan adamlar sarı olur
Nəsiminin soyulmuş rəngində
And olsun zahidin barmağına

Hərdən sarı saçlı rus qızı ilə sevişmək istəyirəm
Ərik ağacının altında
Otlar solanda saralır
Çünki günəşlə sevişə bilmir
Saralmaq yenidən doğulmaqdır başqa dünyada
Nəsiminin soyulmuş rənginə bürünməkdir eşq
And olsun Zahidin barmağına

Günəş batanda Nəsiminin səsini eşidirəm…

***

Sonuncu Orxan

Dieqo Armando Maradonaya

Gözəl bir qadın olsaydı
dəli kimi sevib evlənsəydim.
körpəm olsaydı qucağında
baxıb-baxıb xoşbəxt olsaydım.
sonra bir əndamlı iblis məni yoldan çıxarıb,
ailəmdən soyudub aramıza daş qoysaydı
soyuyub qadınımdan da, körpəmdən də
hamını, hər şeyi buraxıb
boş bir otaqda dinməzcə
içib-içib içimi yesəydim...
həmdəm olmağa bir əl,
bir qucaq, bir sığal olmasaydı...

yox, özümü bu sonsuz boşluqdan atmazdım
özümü dəli olmağa da qoymazdım.

evimə qayıdıb arvadımın
ayaqlarını qucaqlayardım
və “bağışla məni” deyərdim.
bilirəm, o da sakitcə gətirib
qabağıma çay qoyub
gülümsəyərdi...
məni bağışladığından deyil.
həyatında daha bir alçaq sifəti
tanıdığına görə
gülümsəyərdi.
yadınızda qalsın
gözəl qadınların həyatında
alçaq adamlar daha çox olur...


***

Nilufər Lətif

Nə mən səni sevdim nə də sən məni,
Yalandan aldatdıq bir-birimizi
Danışdıq, gülüşdük dilə nə var ki?
Aldada bilmədik ürəyimizi.

Yandıq biz ocaqda yaş odun kimi,
Tüstümüz qovruldu öz içimizdə.
Alovsuz yananlar kömür tək qalar,
Yandıq kömürümüz qaldı bizimdə.

Ayrıldıq. Əfsus, gec oldu fəqət.
Biz gərək əvvəldən birləşməyəydik
Ömürlük yaşamaq zarafat deyil,
Yoldaş olanda biz tələsməyəydik...

Kömürü yenidən yandırmaq olar,
Birdə yansaq donub kül olacağıq .
Ancaq, o da var ki ikinci dəfə,
Yansaq da alovsuz biz yanacağıq.

Mükafat fondu aşağıdakı kimidir:

Birinci yer:500 manat

İkinci yer:300 manat

Üçüncü yer:200 manat

Əsər qəbulu sentyabrın 16-dan oktyabrın 10-dəkdir.

Qeyd: Şərtlərlə uymayan iştirakçılar müsabiqədən kənarlaşdırılacaq.

Şərtlər

Şərtlərdə yenilik

Göndərilən mətnlər

Yeni mətnlər

Növbəti mətnlər

news-inner-user
Bir Şeir

23 məqalə

Oxşar xəbərlər

Xəbər lenti

7 yaşında atasını güllələdilər, Rəsul Rza onun xəstələnməsinə dözməyib dünyasını dəyişdi, ərinin öldüyünü axıracan bilmədi – Nigar Rəfibəylinin film kimi həyatı
21:00 23 İyun 2021
Mədəniyyət Nazirliyindən yeni kampaniya
18:44 23 İyun 2021
Dodaqların əriyən şamdır - Yeni şeirlər
18:03 23 İyun 2021
Bəsit forma oyunları – Gənc şairləri tənqid etdilər
17:15 23 İyun 2021
Filmimiz beynəlxalq mükafata layiq görülüb
16:28 23 İyun 2021
Ukraynanın yumor şousunda Bakı komandası da yer aldı
15:47 23 İyun 2021
Rəngkarlıq Muzeyində gənclər üçün ustad dərsləri davam edir
15:01 23 İyun 2021
Azyaşlı qızla evləndi, arvadı onu yatdığı yerdə tərk elədi, eyvandan yıxılıb öldü – “Arşın mal alan”ın talesiz Soltan bəyi
14:20 23 İyun 2021
Azərbaycan Beynəlxalq Film Festivalında təmsil olunub
13:41 23 İyun 2021
Nazirlik Qarabağdan film çəkmək istəyirsə... – Sevda Sultanova yazır
12:59 23 İyun 2021
"Fəlakət" boşandı
12:49 23 İyun 2021
Fərid Hüseynin kitabı Moldovada çap olunub
12:25 23 İyun 2021
Xanım şairimizin ən gözəl sevgi şeiri – Mətn
11:50 23 İyun 2021
Yaşı keçmiş subay kişilərin qorxuları - Günel Natiq yazır...
11:12 23 İyun 2021
Millət vəkilindən ilginc açıqlama: “Hüseyn Cavidi oxuya bilmədim”
10:38 23 İyun 2021
“Yaxından” adlı sərgi açılıb
10:04 23 İyun 2021
Qənirə Paşayeva: “Vaqif Səmədoğluna dedim, bir də məni belə məclislərə çağırmayın” – Müsahibə
09:01 23 İyun 2021
"Yeddi oğul istərəm" filminə çəkildiyinə görə peşman olub ağlayan Xalq artisti - Maraqlı faktlar
21:00 22 İyun 2021
Bakı Musiqi Akademiyasının 100 illiyi qeyd edilib
19:30 22 İyun 2021
Şuşa ilə bağlı yeni qurum yaradıldı
18:47 22 İyun 2021