news-inner
clock12:31 calendar-gray 25 Dekabr 2017 view-gray346 dəfə oxunub
view-gray346 dəfə oxunub

Hardasan, öldürür bu təklik məni – Ramiz Qusarçaylının şeirləri

Bu gün tanınmış şair Ramiz Qusarçaylının doğum gündür. Kulis.az bu münasibətlə şairi təbrik edir, onun şeirlərindən seçmələri oxucuların diqqətinə çatdırır.

Hardasan

Hardasan, öldürür bu təklik məni,

Ovutmur bu güllük, çiçəklik məni…

Sənsiz göyüm-göyüm göynəyirəm mən,

Sənsiz bu dünyanı neynəyirəm mən…

Pirdi, övliyadı, nədi, bilmirəm,

Eşqə bax, imana, dinə gəlirəm.

Mən səndən ayrılıb gedə bilmirəm,

Mən səndən ayrılıb sənə gəlirəm.

Bir bəyaz duyğutək gəlləm yuxuna,

Durub şirin-şirin səslərəm səni.

Büküb qarasına, büküb ağına,

Gözümün içində bəslərəm səni.

Gözümdə nə qədər gecə ağarıb,

Özüm də bilmirəm necə ağarıb,

Nazın bu sevginin göz dağı olub,

Sinəm bu sevginin dustağı olub…

İki göz dolusu ağlaram səni,

İki dodaq boyu gülləm səninlə.

Gizlicə yolundan saxlaram səni,

Dünyanı ikiyə bölləm səninlə.

Hardasan, öldürür bu təklik məni,

Ovutmur bu güllük, çiçəklik məni…

Sənsiz göyüm-göyüm göynəyirəm mən,

Sənsiz bu dünyanı neynəyirəm mən…

Mən kənddən çıxanda gecə yarıydı

Mən kənddən çıxanda gecə yarıydı

Söyüdlər yol üstdə tellənirdilər.

Coşan ürəyimin duyğularıydı,

Sinəmdən süzülüb sellənirdilər.

Enib dərələrin, düzlərin üstə,

Gecə öz diliylə layla deyirdi.

Baş qoyub dağların dizləri üstə

Yollar şirin-şirin mürgüləyirdi.

Mehlə sığallanıb nazilən otlar,

Şehli nəvazişə bükülürdülər.

Ayağım altında əzilən otlar,

Torpaqdan yapışıb dikəlirdilər.

Qönçələr çəmənə pıçıltı salıb,

Yuxulu-yuxulu çiçəkləyirdi.

Yumru evlərini çiyninə alıb

İlbizlər izimlə iməkləyirdi.

Gedirdim, gecənin haysız, haraysız,

Həzin nəğməsindən doyammamışdım.

Qəlbimdə sübhədək oyaq qalan qız …

Hələ yuxusundan oyanmamışdı…

Mən kənddən çıxanda gecə yarıydı,

Ay örpək çəkmişdi çöllərin üstə.

Heyrətim yolunu azan arıydı,-

Uyuyub qalmışdı güllərin üstə …

Qurudub göndərmə bənövşələri

Əlimə alınca əlim qurudu.

Qurudub göndərmə bənövşələri.

Nəfəsim qurudu, dilim qurudu

Qurudub göndərmə bənövşələri.

Çatmadım bu il də yaza bilirəm,

Darıxa bilirəm, susa bilirəm,

Özüm quruyanda dözə bilirəm

Qurudub göndərmə bənövşələri.

Əl saxla, dər saxla, təzə-tər saxla,

Çıxart ürəyimi, üstə sər, saxla,

Mənə də ölməyə bir az yer saxla

Qurudub göndərmə bənövşələri.

Yağış

Bulud qara, düzüm ağ,

Sudan tutaq uzanaq…

Göy süpürür tozanaq

Toz yağışı öldürür.

Dəniz gülür, dan gəlir,

Dalğanı ley san, gəlir,

Gözündən leysan gəlir

Qız yağışı öldürür.

Yer bir zəmi, biçir göy,

Yeri öy-öy içir göy,

Yaşıl səsdən keçir göy

Yaz yağışı öldürür.

Əl açır qara, damlar

Dil açır qara damlar,

Gül açır qar adamlar

Buz yağışı öldürür.

Tufan qəfil, su ani,

Ölüm ötən qu fani…

Söz ən böyük Sunami

Söz yağışı öldürür…

***

Ağlayırsan, indi ağla,

Mən öləndə ağlama.

Qəbrim üstə güllər solub

Xəzan gələndə ağlama.

Sıxılma yas saxlayanda,

Geyib qara bağlayanda,

Ağla, düşmən ağlayanda,

Dostlar güləndə ağlama...

Gözəl davran, gözəl inlə,

Darılma dərd gözəlinlə...

Göz yaşını öz əlinlə

Özgə siləndə ağlama...

Öz tamı var, öz təhəri,-

Ölüm ömrün son bəhəri...

Gizlə gözündən qəhəri

Gözün biləndə ağlama.

Anama

Ürəyim üstündə şam bənövşəsi,

Ayrı nəyim var ki, yanası, anam.

Sənsən gülşənimin qəm bənövşəsi

Sənsən göz yaşımın sonası, anam.

Ovunmaz bu dərdim hər simin üstə,

Qar üstdən qar yağır səbrimin üstə,

Elə ağlayardım qəbrinin üstə,

Qorxdum ki, uçular binası, anam...

Bu zalım fələyin üzü ağ olsun,

Dağı düzdə qalsın, düzü dağ olsun,

Sevməyən kim varsa canı sağ olsun

Məni sevənlərin anası, anam,

Sən ey göz yaşımın sonası, anam...

Eşq yolu

Tanrım, bu yol Eşq yolu,

Gedirəm, bitmirəm ki.

Alırsan, al canımı

Xəsislik etmirəm ki...

Yüz yerdən izlənmişəm,

Düzünə düzlənmişəm,

Gözündə gizlənmisəm

Gözündən itmirəm ki...

Dadmışam hər azardan,

Nəyim var üz qızardan?!

Qorxum yoxdu məzardan,

Piyada getmirəm ki...

news-inner-user

16060 məqalə

Oxşar xəbərlər

Xəbər lenti

Ziyalılar Operativ Qərargaha müraciət etdi
11:16 06 Avqust 2020
Məşhur rejissordan yeni film gəlir - Treyler
10:38 06 Avqust 2020
"Min bir gecə" Vyanada nümayiş olundu
10:04 06 Avqust 2020
İtin kolbasasını uşağına verdiyi üçün villadan qovulan fəhlə - Varisin yeni hekayəsi
08:59 06 Avqust 2020
Kinematoqrafçılar İttifaqı Ayaz Salayevi mükafatlandırdı
18:57 05 Avqust 2020
Masaya dağılmış qırmızı şərab - Mehriban Ələkbərzadəyə...
18:12 05 Avqust 2020
Şamaxıda antik dövrə aid nekropol tapıldı - Fotolar
17:41 05 Avqust 2020
Plastik əməliyyat zamanı dünyasını dəyişdi, bir il sonra səbəbkar həkim də stressdən öldü - Cahandar ağanın qızının faciəvi sonu
17:11 05 Avqust 2020
Məşhur yazıçı həbs olundu
16:28 05 Avqust 2020
Stiven Kinqdən yeni roman
14:50 05 Avqust 2020
Nə düşünürsən, Günel? - Orxan Həsəni yazır...
14:21 05 Avqust 2020
“Məni qardaşım hamilə qoydu" – Qırmızı donda intihar edən qızın faciəsi
13:32 05 Avqust 2020
Kamal Abdulladan orijinal layihə - Müsahibə
12:56 05 Avqust 2020
"Altın Koza"nın keçirilmə tarixi bəlli oldu
12:14 05 Avqust 2020
Məşhur türk aktyoru vəfat etdi
11:20 05 Avqust 2020
Azərbaycanlı şairin şeirləri türk saytında
10:42 05 Avqust 2020
"Kobra"nın silahdaşı vəfat etdi
10:09 05 Avqust 2020
Mahnıları dillərdə dastan olan 5 Azərbaycan filmi - Video
09:01 05 Avqust 2020
Feysbuk məşhur yumor ustasının hesabını bağladı - Yəhudi düşmənçiliyinə görə
18:57 04 Avqust 2020
Məşhur romana çəkilən serialın ilk görüntüləri yayıldı - Foto
18:02 04 Avqust 2020