Kulis.az-da mərhum şair Kələntər Kələntərlinin “Bu səfər bitən deyil” kitabından bir xatirə yayımlanıb. Həmin xatirə birmənalı qarşılanmadı. Xatirədə həbsdən çıxan şairin təzədən Yazıçılar Birliyinə üzv olmaq istəyinə İsmayıl Şıxlı “Bundan sonra bizim cərgəmizə qayıtmağa sənin mənəvi haqqın yoxdur” cavabını verib.
Məsələ ilə bağlı yazıçının oğlu, tanınmış jurnalist Elçin Şıxlı fikirlərini bildirib. O saytımıza açıqlamasında qeyd edib ki, K.Kələntərlinin yazısı başdan-ayağa səhvlərlə doludur:
“Orda yazır ki, Balaş Azəroğlu katib idi. Halbuki 81-ci ildən sonra katib seçilib. Ümumiyyətlə, Kələntər Kələntərlinin yazıları ilə bağlı həmişə etirazlar olub. Nəriman Qasımoğlu və Paşa Əlioğlunun etirazları yadımdadır. Qaldı İsmayıl Şıxlıya... İsmayıl Şıxlı Azərbaycan çörəyini yeyib Azərbaycanda separatçılıq eləyən, milli ədavət salan adama o sözləri deyərdi. İsmixan Rəhimov adında adam olub, bizim gözəl dilçimiz. Gülhüseyn Hüseynoğluyla Azərbaycanın müstəqilliyi üçün gizli təşkilat yaratmışdı. Müharibədən sonra hər ikisi həbs olunub sürgün edilmişdi. Atamın aspirant yoldaşı olub İsmixan. Mənə maraqlıdır, həbsdən qayıdan adamla görüşən, ona kömək eləməyə qorxmayan İsmayıl Şıxlı necə Kələntərə yardım etməzdi? Əgər Kələntər düz adam olsaydı, o sözləri ona deməzdi. Fikir verin, yazıda Kələntər yazır ki, sevimli müəllimim İsmayıl Şıxlı parkda qoluma girdi və məni kabinetinə dəvət etdi. Axı qoluna girib kabinetinə dəvət edən adam pis ola bilməz. Məntiq yoxdur burda. Yəqin, kabinetinə çağırıb Kələntəri, o da artıq-əskik danışıb və o da elə deyib. Əcəb eləyib və düz eləyib. Ümumiyyətlə, İsmayıl Şıxlının Azərbaycana xor baxan adamlara münasibəti bu cür olub. Separatçıları qovmaq və yerini göstərmək lazımdır”.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
