Qadını namus ləkəsiylə, kişini qeyrət tikəsiylə

Qadını namus ləkəsiylə, kişini qeyrət tikəsiylə
17 dekabr 2014
# 08:28

Nolar,

gedəndə elə et ki,

gələnlər ayaq izini görməsin.

Yoxsa,

gələnlər duz basacaqlar,

ayağını basdığın yerə.

Nolar,

itəndə elə it ki,

gözün məni görməsin.

Yoxsa,

Birdə qayıdarsan

elə hey, azdığın yerə.

Nolar,

batanda elə bat ki,

dəniz səni görməsin.

Yoxsa,

mən görüm deyə,

dalğalardan dağ çəkər.

Çəkər, batdığın yerə.

Nolar,

sakit,

səssiz,

izsiz.

Get,

it,

bat.

Yoxsa...

***

Sən uşaqlığımda

itirdiyim qızsan.

Çəmənlikdə itirdim

otların arasında.

Sevgim kimi.

Bəlkə də oyuncaqlar

arasında olsaydın,

tapardım.

Tapardım səni...

Qəmim kimi.

Amma mənim heç

oyuncağım olmadı ki,

çünki oyuncağın

oyuncağı olmur, gözəl.

oyuncaqlar oynaya

bilmir.

Onlar oynadılır,

istifadə edilir,

atılır.

Atıb gedib Allah məni.

Atıb gedib.

sənin kimi...

***

İnanın səmimiyyətimə,

İndi daha çox

bir qadının tellərində

yox olmaq istəyirəm

özü də səmimi qəlbdən...

Bu məmləkətdə insanı

əzmək necədə asandı.

Qadını namus ləkəsiylə,

kişini qeyrət tikəsiylə,

Şairi sevgi kəlməsiylə...

# 476 dəfə oxunub

Oxşar xəbərlər

# # #