Desələr bu yeni il gecəsi bir arzu tut ürəyində həyata keçəcək, yalnız bu yeni il gecəsi, yalnız bir arzun həyata keçəcək.

Deyərdim Qarabağın da bizim olduğu Sovet dönəminin 80-ci illərini qaytarmaq istəyirəm!

Yox, nostalgiyaya tutulmamışam, irəli baxaraq irəliləyənlərin yanındayam. Hər halda elə olmaq istəyirəm, geri baxıb ah-uf edənləri də sevmirəm.

Amma bir arzu ki, həyata keçsə həsrətində olduğum hər şey, elə irəlidə olacağına ümid etdiklərim də onun içindədirsə niyə onu istəməyim...

Qalan bütün arzularım o arzunun içində var:

Sakit, firavan, pul dərdi çəkməyəcəyim bir həyat istəyirəm. İstəyirəm övladlarım normal təhsil alsınlar, sabah iş yeri problemləri olmasın. Normal insan kimi yetişsinlər, gələcəklərinin təmin olunacağına şübhəm olmasın.

İstəyirəm, onları hərtərəfli təmin edə bilim. Oxumaqları üçün repetitorlara ehtiyac olmasın. Təhsil sistemi özü məktəbdə bunu onlara versin.

İstəyirəm onlar xeyrin şərə qalib gəlməsinə inansınlar, ədalətin təntənəsinə şübhə etməsinlər.

Dostluqlar təmənnasız, sevgilər saf olsun.

İnsanlar arasında ünsiyyət virtual xarakter almasın, çəpər başı, süfrə arxası ünsiyyətlərin arzusundayam.

Hamı bir-birinə yaxın olsun, intiharlar, qətllər olmasın, bu qədər olmasın. Qardaşı qardaşı, ər arvadını düşmən gözündə görməsin.

Etika, estetika həyat tərzimiz olsun. Mədəni danışıb, mədəni davranaq.

Xəstələnəndə həkimə etibarımız olsun, psixiatrlara, heç psixoloqlara da ehtiyacımız olmasın. Qəlbimizi dosta, yara açaq.

Həmişə evdən işə, işdən evə tələsək. Əyləncəmiz də sivil olsun.

Ədəbiyyat, incəsənət, mədəniyyət yüksək səviyyədə tapınan yerimiz olaraq qalsın. İnanaq, indi inanmadığımız yaxşı nə varsa hamısına inanaq, ümumi ideologiyamız olsun.

Düşmənçilik deyil, sağlam rəqabət aparaq. Kimsə özünü ətrafındakılardan üstün göstərməyə çalışmasın.

Ən əsası Qarabağ, evimiz-eşiyimiz özümüzün olsun. Ayağımızı yerdə, doğulduğumuz, yaşadığımız torpaqda güvəndə hiss edək.

Bunların hamısının bir arada olması üçün Sovet dönəminin 80-ci illərinin geri qayıtmasını arzu edirəm. Nə müşkül arzudur ki, bəlkə Şaxta baba bunu edə bilər...

• Yarın əllərinə toxunan fırçanın bəxtəvərliyi - Yenilikçi ruhun nişanı
• Zəfər Gününə həsr olunan elektron məlumat bazası təqdim edildi
• Elza Seyidcahan tanınmış aparıcının belində ağac sındırdı