Dünən bəzi sosial şəbəkələrdə problem yarandı.

Düzü, aktiv feysbuk istifadəçisi olsam da, məsələdən səhər işə gələndə xəbər tutdum, çünki dünən gecə bir dostumla həyatın içində idik.

Özümüzdən başqa nəyəsə, kiməsə ehtiyacımız olmadığından telefonlarımızı söndürüb bir qırağa qoymuşduq.

Düşünürəm ki, təfərrüatlara girməsəm də olar.

Amma görürəm, insanlar bunu əməlli-başlı problemə çeviribmiş. Bütün gecəni feysbuk səhifəsini, mesenceri yeniləyib hər şeyin qaydasına düşməyini gözləyənlər olub.

İnsanlar əməllicə narahat olub biri-birinə zəng edirmiş ki, nə olub bu feysbuka, vatsapa niyə girmək olmur?!

Ah, nə böyük faciə!

Bir daha əmin oldum ki, 21-ci əsrin insanları artıq tamamilə elektronlaşmaqdadır.

Bunca asılılıqlar, zərərli vərdişlər arasında bir də İnternet bəlası canımıza darış gəlib. Xüsusən, sosial şəbəkələrin iti caynaqları – feysbuklar, vatsaplar, instaqramlar, tik-toklar, “rəngbərəng” saytlar, boğazımızdan yapışıb, buraxmır.

Artıq vay-fay olmayan yerlərdə havamız çatmır, meqabaytımız bitəndə isə boğuluruq. Bu da virusun bir başqa növüdür yəqin, hələ fərqində deyilik.

Bu virusa qarşı ən yaxşı mübarizə isə düşüncə immunitetimizi, intellektimizi artırmaqdır.

Mənim klaviatura, monitor arxasında əyləşib yazdığım bu yazıda sizə “kitab oxuyun!”, “mütaliə edin!” məzmununda cümlələr səpələmək fikrim yoxdur.

Həyat öz həyatınızdır!

Onu istədiyiniz kimi yaşamaq seçimi də sizin əlinizdədir.

Amma sosial şəbəkələrə bu qədər aludə olmağımızın məni narahat etdiyini deməyə bilmirəm.

Telefonu söndürüb həyatınızı yaşamağı öyrənin.

Ən azından, heçmi gecəni bərabər keçirə biləcəyiniz gözəl bir dostunuz yoxdur?

• Xalq artistinin saxtakarlığı
• "Mədəniyyət Nazirliyinə üç layihə təqdim edilib" - Azər Aydəmir
• Azərbaycan London Beynəlxalq Kitab Sərgisində