Bəzən hər gün eyni küçə adını eşidirik, deyirik, hətta yazırıq.

Amma fərqinə varmırıq.

Kimdi bu adam?

Adını küçə verilibsə demək xidmətləri var.

Yaddaşlarda yaşamağa layiq olub.

Adı əbədiləşib, düzdü.

Xatirəsi əbədiləşibmi bəs?

Tanıyırıqmı onu?

Kulis.Az-ın “Doğma və yad küçələr” layihəsində Bakı şəhərində olan tanımadığımız küçə adlarından bəhs olunacaq.

Zivər bəy Əhmədbəyov küçəsi Yasamal rayonu ərazində yerləşir. Küçə Allahyar Nəsibov küçəsi ilə kəsişmədən başlayıb, “Azad qadın” heykəlinin qarşısında Cəfər Cabbarlı küçəsi ilə birləşir. “Nizami” metrostansiyası bu küçədə yerləşir. Metrostansiyasının qarşısında Zivər bəy Əhmədbəyovun heykəli və onun adını daşıyan park var. Park 2011-ci ildə salınıb.

Bəs Zivər bəy Əhmədbəyov kimdir?

Zivər bəy Əhmədbəyov 1873-cü ildə Şamaxı şəhərində doğulub. Orta təhsilini Şamaxıda alıb. 1902-ci ildə Peterburq İnşaat Mühəndisləri İnstitutunu bitirib. 1910-cu ildən Bakı şəhərində yaşayıb. 1902-1917-ci illərdə Z.Əhmədbəyov Bakı Quberniyasının İdarəsində, sonra isə Bakı şəhər idarəsində memar işləyib.

Azərbaycan Xalq Cümhuriyyəti elan olunduqdan sonra o, Bakı şəhərinin baş memarı olub və 1922-ci ilə kimi bu vəzifədə qalıb. Şamaxıda Cümə məscidinin, İmam məscidinin, Bakıda Təzə Pir məscidinin, Göyçayda Əbülfəzlil Əbbas məscidinin (1898-1902), Əmircanda Murtuza Muxtarov məscidinin (1908) və Vladiqafqazda bir sıra yaşayış, məişət binaları onun layihəsi əsasında tikilib.

Əmircanda layihəsini verdiyi məscid isə Şərq memarlığının ən yaxşı incilərindən biri kimi YUNESCO-nun tarixi abidələr siyahısına salınaraq qorunur.

Z.Əhmədbəyov öz layihələrində Qərbi Avropa və Şərq memarlıq ənənələrini böyük məharətlə birləşdirirdi. Bakıda Oftalmologiya institutunun binası və onun layihəsilə tikilən bir sıra yaşayış binaları bu gün də göz oxşayır.

1917-ci ildə Z.Əhmədbəyov "İslam mədəniyyət abidələrini qoruyan", 1919-cu ildə isə Şamaxıda mədəniyyət abidələrinin öyrənilməsi ilə məşğul olan "Yeni Şirvan" cəmiyyətlərini yaradıb.

Zivərbəy Əhmədbəyov 1925-ci ildə Bakıda intihar edib.

"Nizami" metrostansiyası qarşısındakı, Zivər bəy Əhmədbəyovun adını daşıyan parkla üzbəüz bina da onun layihəsi əsasında inşa edilib.

• Azərbaycanın turizm imkanları MDB ölkələrində tanıdılır
• Venesiya Film Festivalı “Qızıl şir”i təqdim edəcək
• Bilik Gününə həsr olunmuş kitab sərgisi açıldı