İfaçılıq istedadı olan gənclər üçün bütün respublika üzrə elan olunan “SƏHNƏDƏ” müsabiqəsinin canlı dinləmələri yekunlaşıb.

Bu barədə APA-ya Mədəniyyət Nazirliyindən məlumat verilib.

Bildirilib ki, müsabiqənin Lənkəran, Quba, Şəki, Gəncə, Yevlax, Bakı və Naxçıvan şəhərlərində keçirilən kastinq mərhələsində iştirak haqqı qazanan 100-dən çox gənc münsiflər heyəti qarşısında çıxış edərək ifaçılıq bacarığını nümayiş etdirib.

Müsabiqəsinin final mərhələsinə 10 gənc seçilib.

Müsabiqənin bundan sonrakı mərhələsində kastinqlərdəki dinləmələrin yekununda öz istedadı ilə münsiflərin diqqətini cəlb edən və seçim meyarlarına uyğun gələn 10 gəncin Bakıda baş tutacaq qala konsertində çıxış etmək şansı olacaq. Konsertin yekununda münsiflərin qərarı ilə seçilən 3 gənclə “RÄNG” leyblı arasında 1 illik prodüsserlik müqaviləsi imzalanacaq. Müsabiqənin kastinq mərhələləri və möhtəşəm “Böyük Final” Azərbaycan Dövlət Televiziyasında (AzTV) teleşou formatında yayımlanacaq.

Xatırladaq ki, “SƏHNƏDƏ” Gənc İstedadlar Müsabiqəsi Azərbaycan Respublikası Gənclər Fondunun dəstəyi, Mədəniyyət Nazirliyi və “RÄNG” leyblın tərəfdaşlığı, “GəncSİMA” İctimai Birliyinin təşkilatçılığı ilə keçirilir. Müsabiqənin məqsədi dövlət gənclər siyasətinin vacib hissəsi olan paytaxt və regionlarda xüsusi istedada malik olan gənc ifaçıları aşkar etmək, onların qabiliyyətlərinin inkişafı və sənətdə öz yerini tapmasına dəstək göstərməkdir.

• "Xoşbəxt" gün - Günel Mehrinin yeni hekayəsi
• Ruhların səssiz addımladığı şəhər — Xocalı
• Müğənni Kərimin ölkədən çıxışına qadağa aradan götürüldü