Aparıcı və nitq mədəniyyəti üzrə mütəxəssis Cəlalə Nəzəroğlunun “Danışığınla həyatı qazan” kitabının təqdimat mərasimi olub. 3 saylı “ASAN Xidmət” mərkəzində keçirilən tədbirdə millət vəkilləri, tanınmış ziyalılar, o cümlədən, dilçi alimlər iştirak edirdilər.

Tədbirdə çıxış edənlər “Danışığınla həyatı qazan” kitabının ana dilində səlis, sərbəst danışmaq, fikir və duyğuları mükəmməl ifadə etmək, komplekslərdən uzaqlaşmaq, iş və şəxsi həyatda uğur qazanmaq üçün dəyərli vəsait olduğunu vurğuladılar.

Hazırda “ASAN Radio”da aparıcılıq fəaliyyətini davam etdirən Cəlalə Nəzəroğlunun kitabında qüsursuz nitqə sahib olmağın yolları mərhələli şəkildə göstərilib. Kitabda ağız tənbəlliyinin aradan qaldırılması, dolğun səsə sahib olmaq, söz ehtiyatının artırılması yolları, düzgün nəfəs almaq, auditoriya qarşısında sərbəst çıxış etmək, insanlarda xoş təəssürat yaratmaq üçün “Nəyi, harada, necə demək” kimi bir çox vacib məsələlər yer alıb. Kitabda səlis danışığı sayəsində uğur qazanmış insanların həyat hekayələri, bəzi tarixi çıxışlar yer alıb.

Diksiya təlimçisi Cəlalə Nəzəroğlu ərsəyə gətirdiyi kitab haqqında danışarkən bildirdi ki, başqalarının bizi maraqla dinləməsini təmin etmək, razı salmaq, qəbul olunmaq, seçilmək və hədəflərimizə çatmaq istəyiriksə, doğru və təsirli ünsiyyət qurmalıyıq. Bunu təmin edən isə qüsursuz danşıq qabiliyyətidir. Müəllif qeyd etdi ki, bu kitab yaşından, məsləyindən, savdından asılı olmayaraq, bütün oxucuların karyera və şəxsi həyatlarındakı problemlərin səbəbini tapmağa və asan yolla həll etməyə kömək edəcək.

• “Tağıyev: Neft” filminin ilk treyleri yayımlanıb
• “İranə Qasımova ilə açıq poeziya mikrofonu” layihəsinin beş ili tamam oldu
• Sənət adamları: "Nazir də onunla bacarmır, o əməkdaş bizə qan uddurur" - İttiham