Yayın istisində bir çox insanın ilk seçimi dəniz kənarına üz tutmaq olur. İstirahət, günəş vannası, sərin sular və təbiətlə baş-başa qalmaq insanı həm fiziki, həm də mənəvi olaraq rahatladır. Amma dəniz tətilinin xoş xatirələrlə yadda qalması üçün bəzi vacib təhlükəsizlik və sağlamlıq qaydalarını da unutmamaq lazımdır.

Kulis.az sizə dəniz səfərindən əvvəl mütləq nəzərə alınmalı 6 əsas məqamı təqdim edir :

Hava şəraitini əvvəlcədən yoxlayın!

Əksər insanlar dənizə yollanarkən havaya fikir vermir. Halbuki güclü külək, qəfil fırtına və ya dalğalı hava dənizdə təhlükə yarada bilər. Dəniz suyu temperaturunun aşağı olması isə hipotermiya riskini artırır. Bu səbəbdən, getməzdən öncə hava proqnozuna baxmaq vacibdir.

Günəşə aldanmayın!

Günəş altında uzun müddət qalmaq ciddi dəri yanıqları, başgicəllənməsi və günvurma kimi hallara səbəb ola bilər. Xüsusilə, günün ən təhlükəli saatları - saat 11:00-dan 16:00-a kimi olan zaman aralığında günəşdən qorunmaq üçün tədbir görmək lazımdır. Geniş kənarlı papaq, gün eynəyi və "SPF 30" olan günəş kremləri sizin ən yaxın köməkçiniz olmalıdır.

Rəsmi çimərlikləri seçin, xəbərdarlıq işarələrinə əməl edin!

Dənizdə təhlükələr yalnız təbiətlə bitmir. Ən çox rast gəlinən təhlükələrdən biri “tərs cərəyan” adlanan dəniz axınlarıdır. Bu cərəyanlar heç gözləmədiyiniz anda sizi dənizin içinə çəkə bilər. Buna görə də, yalnız nəzarət olunan, xilasedicilərin olduğu rəsmi çimərliklərə üz tutmaq tövsiyə olunur. Çimərlikdə qırmızı bayraq görürsünüzsə, bu o deməkdir ki, dəniz təhlükəlidir və üzmək olmaz!

Su və yüngül qidalarla özünüzü təmin edin

Dəniz sahilində keçən saatlar bədəndə su itkisinə səbəb ola bilər. Belə hallarda susuzluğun qarşısını almaq üçün yanınıza bol su götürmək vacibdir. Yüngül və tez xarab olmayan qidalar isə gün boyu enerjinizi yüksək saxlamağa kömək edəcək. Alkoqollu içkilər isə həm susuzlaşdırır, həm də ayıqlığı azaldır deyə uzaq durmağınız məsləhətdir.

Gigiyenaya və şəxsi sağlamlığa fikir verin

Ayaqyalın qumda gəzmək xoş təcrübə kimi görünsə də, bu, göbələk və parazit infeksiyalarına yol aça bilər. Eyni zamanda, dəridə açıq yara varsa, dənizə girmək də risklidir. Bu infeksiyalara şərait yarada bilər. Əgər çimərlikdə duş varsa, dənizdən çıxdıqdan sonra istifadə etmək məsləhətdir.

Şəxsi əşyalar və təhlükəsizlik ön planda olmalıdır

Telefon, pulqabı və digər dəyərli əşyalarınızı qorumaq üçün su keçirməyən çanta götürmək tövsiyə olunur. Əgər yaxşı üzə bilmirsinizsə, dənizə tək girməkdən çəkinin. Uşaqlarınız və ya yaşlı ailə üzvləriniz yanınızdadırsa, onlara daim nəzarət etməyi unutmayın. Dənizdə bir anlıq diqqətsizlik acı nəticələrə gətirib çıxara bilər.

Dənizə getmək, qaydaları bilinərsə həm təhlükəsiz, həm də yadda qalan istirahət məkanına çevrilə bilər. Tətildə rahatlıqla dincəlmək üçün bu sadə, amma mühüm məqamlara əməl etməyi unutmayın.

• Məşhur aktyor dünyasını dəyişdi
• Yaşamaq və ədalətsiz olmaq eyni şeydir - Məşhur filmdən esse
• “Bizim vaxtımızda uşaq...” - Kim nə deyib, kim nə geyinib, kimin oğlu nə iş görür?