Görkəmli dramaturq, ictimai xadim, “Molla Nəsrəddin” ədəbi məktəbinin banisi və ideya müəllifi Cəlil Məmmədquluzadənin anım günüdür.

Kulis.az-ın məlumatına görə, 1869-cu il fevralın 10-da dünyaya göz açan Cəlil Məmmədquluzadə ibtidai təhsilini Naxçıvanda alıb, daha sonra Qori Müəllimlər Seminariyasını bitirib. Ərəb, fars, rus dillərini mükəmməl bilən ədib bir müddət müəllim kimi fəaliyyət göstərib.

Azərbaycanda və Şərqdə qadınların və kişilərin hüquq bərabərliyi ideologiyasının əsasını qoyanlardan biri olan dramaturq ilk nömrəsi 1906-cı il aprelin 7-də çıxan "Molla Nəsrəddin" jurnalının nəşrinə başlamaqla Azərbaycanda, eləcə də türk-müsəlman dünyasında satirik jurnalistikanın da banisi olub.

O, bütün şüurlu ömrünü maarifçiliyə, cahilliyə, savadsızlığa və dini xurafatlara qarşı mübarizəyə, millətimizin azadlığına həsr edib.

Cəlil Məmmədquluzadə “Yeni yol” qəzetinin redaktoru, Ümumittifaq Mərkəzi Yeni Əlifba Komitəsinin üzvü, Bakı Azad Tənqid-Təbliğ Teatrının təşkilatçılarından olub, “Maarif və mədəniyyət”, “Yeni kənd”, “Şərq qadını” və s. mətbuat orqanlarında fəaliyyət göstərib.

Ədib yaradıcılığında milli şüur (“Anamın kitabı”, 1919), məktəb tərbiyəsi, ümumiyyətlə xalq maarifi (“Danabaş kəndinin məktəbi”, 1921) problemlərinə geniş yer verib. “Dəli yığıncağı” (1936-cı ildə nəşr olunub) pyesində feodal-patriarxal münasibətlər, din və fanatizmi kəskin tənqid atəşinə tutub.

Cəlil Məmmədquluzadə 1907-ci ildə ədib Həmidə xanım Əhmədbəy qızı Cavanşirlə ailə həyatı qurub. Bu izdivacdan onların Midhət və Ənvər adlı iki oğulları dünyaya gəlib.

Cəlil Məmmədquluzadə 1932-ci il yanvarın 4-də Bakı şəhərində vəfat edib. Məzarı Fəxri xiyabandadır.

• "Vətəndaş A" serialına görə İTV-yə xəbərdarlıq edildi
• Azərbaycan Qazaxıstanda keçirilən IX Beynəlxalq Teatr Festivalında təmsil olunur
• Şuşaya həsr olunmuş virtual sərgilərin təqdimatı keçirilib