İyunun 2-də “ARB Günəş” və “Animacenter” özəl animasiya mərkəzinin birgə layihəsi çərçivəsində ərsəyə gələn ölkənin ilk cizgi serialının DOST İnklüziv İnkişaf və Yaradıcılıq Mərkəzində təqdimatı olub.

Kulis.az xəbər verir ki, maarifləndirici və əyləncəli məzmuna malik “Balaş” adlı cizgi serialı Uşaqların Beynəlxalq Müdafiəsi Günü münasibətilə Mərkəzdə həssas qruplara aid uşaq və yeniyetmələrə təqdim edilib.

Tədbirdə DOST İnklüziv İnkişaf və Yaradıcılıq Mərkəzinin direktoru Elnarə Ənsari Birinci vitse-prezident Mehriban Əliyevanın təşəbbüsü ilə yaradılan Mərkəzdə əlilliyi olan şəxslər və digər həssas qruplardan olanların yaradıcı potensialının inkişafı üçün aparılan işləri diqqətə çatdırıb.

“ARB Günəş” televiziyasının rəhbəri Məhsim Məhsimov 10 il əvvəl fəaliyyətə başlayan bu televiziyanın 2018-ci ildə yaradılan peşəkar dublyaj studiyasında onlarla cizgi və animasiya filminin Azərbaycan dilinə tərcümə olunaraq, azyaşlı izləyicilərə təqdim edildiyini bildirib.

Təqdimat mərasimində serialının rejissoru və animatoru Sultan Abbasbəyli, ssenari müəllifi Reyhan Yusifqızı, serialda müxtəlif personajları səsləndirən Rəhim Rəhimov çıxış edərək cizgi serialının uşaqları maarifləndirəcəyini söyləyiblər.

Artıq 28 seriyası hazır olan bu cizgi filmi uşaqlara milli dəyərləri, ailə bağlarını, dostluq münasibətlərini və əxlaqi prinsipləri aşılayır, onların estetik zövqünü inkişaf etdirir.

Qeyd edək ki, təqdimat mərasiminin sonunda uşaqlara “ARB Günəş” televiziyası tərəfindən müxtəlif mövzuda uşaq ədəbiyyatı nümunələri paylanılıb.

• Bizim borcumuz mürgülü xatirələri oyatmaqdır... - Nüsrət Kəsəmənli "Avara" filminə baxanda niyə ağlamışdı?
• İlham Əliyev: "Xarici kəlmələr dilimizi pozur, zənginləşdirmir"
• Prezidentin adından yayılan saxta məlumatla bağlı “Meta”ya çağırış