Təlimləri Avropa sənədli kinosunun tanınmış siması Tue Steen Müller aparacaq.

Kulis.az xəbər verir ki, Azərbaycan Kinematoqrafiya İttifaqı (AKİ) gənc rejissorlar üçün AKIDOCS – Sənədli Filmin İnkişafı və Piçinq layihəsi həyata keçirir. Layihənin gerçəkləşdirilməsindən əsas məqsəd beynəlxalq platformalarda rəqabətədavamlı sənədli film layihələri hazırlamaq və azərbaycanlı müəlliflərin bu sahədə uğur qazanmasına dəstək verməkdir.

Təlimin əsas məşqçisi sənədli kino sahəsində böyük təcrübəyə malik danimarkalı mütəxəssis Tue Steen Müller olacaq. O, 20 ildən artıq Danimarka Kino Şurasında qısametrajlı və sənədli filmlər üzərində çalışıb, həmçinin bir çox beynəlxalq kino dərgilərində yazılarla çıxış edib. Tue Steen Müller eyni zamanda Baltik Film və Televiziya Festivalı, Filmkontakt Nord, Aİ və Avropa Sənədli Filmlər Şəbəkəsinin həmtəsisçilərindəndir.

50 illik sənədli kino təcrübəsinə malik olan mütəxəssis bu günədək 40-dan çox ölkədə təlim və seminarlar keçirib. 2007-ci ildən isə İtaliyadakı Zeliq Sənədli Filmlər Məktəbində müəllim kimi fəaliyyət göstərir. O, Avropa sənədli kinosunda layihələrin inkişafı üzrə tanınmış simalardan biridir.

Qeyd: Təlimin işçi dili ingilis olduğu üçün layihəni təqdim edən komandanın ən azı bir üzvü ingilis dilini bilməlidir.

• Çən güclüdür, yoxsa Qurğuşun? - Rahid Ulusel
• Vətən satanları tanımaq üçün... - Allahyar Eyyuboğlu
• Əllərimdə darıxır əllərinin boş yeri… – Qismətin şeirləri