Ayaz Vəfalıdan Əkrəm Əylisliyə: “Əvvəlcə yaxşı yazı yazsın”

“Ədəbiyyat” qəzetini bəyənməyənləri yaxşı tanıyıram. Onlar əvvəlcə yaxşı yazı yazsınlar, sonra irad bildirsinlər”.

Bunu “Ədəbiyyat” qəzetinin baş redaktoru Ayaz Vəfalı bildirib.

Ayaz Vəfalı modern.az-a deyib ki, kimsə nəyisə bəyənməyə bilər: ”Siz oxucularsınız, oxuyun, görün, bu qəzetdə nə xoşunuza gəlir, nə xoşunuza gəlmir? Dedi-qodu sözlərə başqa nə cavab vermək olar ki!? Mən o adamlarla da işləmişəm. Bilirəm, kimin qabında nə var. Onlara cavab verməyə ehtiyac duymuram. Ən layiqli cavabı “Ədəbiyyat” qəzetinin özü verir”.

Daha sonra baş redaktor deyib: “Heydər Əliyev deyirdi ki, “mən “Ədəbiyyat” qəzetini Moskvada işləyəndə, işləməyəndə də həmişə oxumuşam”. Amma bu adamlar qəzeti heç vaxt əllərinə almayıb. Zəhməti itirənlər çoxdur, amma eybi yox, canları sağ olsun”.

AYB sədri Anar Kulis.az-a verdiyi müsahibədə Birliyin orqanı olan “Ədəbiyyat” qəzeti ilə bağlı narazılıqlardan danışarkən yazıçı həmkarlarını yazı yazmağa səsləmişdi.

Tanınmış yazıçılar Əkrəm Əylisli, Seyran Səxavət və şair Vaqif Bayatlı bu qəzetlə əməkdaşlıq eləmək fikrində olmadıqlarını dilə gətirmişdilər.

Kulis.az Xalq Yazıçısı Əkrəm Əylislidən Ayaz Vəfalının dediklərinə münasibət öyrənmək istəyib. Xalq Yazıçısının cavabı belə olub: “Siz səviyyələri bilə-bilə niyə mənə belə sual verirsiniz?”

• Baş redaktorun sürücüsü, xoşbəxt adam və uçan qarışqa - "Kulis"dən reportaj
• "Coker" filminin treyleri izlənmə rekordu qırdı - Video
• Azərbaycan Milli İncəsənət Muzeyində konsert keçirildi