Milli telekanalın “Mənim Stilim” yarışmasındakı iştirakçıları lap elə onların ailəsini də bircə-bircə bu ağ kağıza qoyub qınamaq, hətta danlamaq da olar, amma bununla hamı əlinə kitab alıb mərifət sahibi olası deyil.
Amma o qızları ora çıxaranları, o verilişi hazırlayanları və o verilişə göz yumub, öz işini gördüyünə görə saytları sorğu-sual edən MTRŞ-ı və MŞ-ı sorğulamaq olar. Cavab verib-verməməyindən asılı olmayaraq. Elə-belə.
YUĞ teatrı binasından köçürüldü. Tarixi binanın sökülməsinə yazarların münasibət bildirməsi, mətbuatın bunu diqqətdə saxlaması çox yaxşı, sevindirici haldır. Bəlkə bu yazıların müəyyən bir effekti də oldu - nə bilmək olar, teatrı nə gözləyə bilərdi?
Amma bu yarı etiraz yarı giley, yarı narahatlıq olan yazılarla birgə bir neçə sual cavabsız qaldı. Teatrın binası söküləcək, bəs o tarixi binanın yerində nə kimi əhəmiyyətli tikili olacaq? Ümumiyyətlə, şəhərin Şəhərsalma və Arxitektura Komitəsinin Bakının baş planında hansı prinsiplər var və ya qorunacaq?
Hətta Mədəniyyət və Turizm Nazirliyinin müvafiq şöbələrindən geniş açıqlama olmadı. Teatrla bağlı nazirliyin planı nədir? Ona yeni bina veriləcəkmi?
Ümumiyyətlə, nazirliyin teatr siyasəti ilə indiyədək hər hansı bir müsahibə ala bilməmişəm, oxuduğum da yadıma gəlmir. Halbuki, yeridir. Böhran ilində mədəniyyət siyasəti necə qurulacaq, prioritetlər nələrdir? Böhran oldu olmadı, il-on iki ay böhran yaşayan sənət adamları böhranda hansı kitabı oxumalıdır?
Sual çoxdur, amma qurumların bu qədər qapalı olması da yaxşı mənzərə deyil.
Sənət adamları bu qədər politkorrekt ikən, dövlət görəvliləri diplomatik cavablar verə bilməyəcəkmi?
Elədirsə, bu başdan köşəni geri götürüm. Nə lazım sual vermək, sizi də, özümüzü də işə salırıq. Eləcə saytlarda söhbətlər açaq, gileylənək, danışaq, arabir də xəbərlər oxuyub həyəcanlanaq.
Dilxoşluq yaxşı şeydi...
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
