Onu özümdən yaşlı düşünmüşəm həmişə. Sözün yaxşı mənasında vaxtdından çox-çox tez kamilləşmiş biridir. O nadir adamlardandır ki, misal üçün bir gün Vargas Lyosa Azərbaycana gəlsə, məmnuniyyətlə qarşısına çıxara bilərik. Əmin olun, bizi layiqincə təmsil edəcək.

Həmişə cümhuriyyət dövrünün böyük şəxsiyyətləri haqqında düşünəndə onların öz dövrünün Qərb ziyalılarından, mütəfəkkirlərindən zərrəcə geri qalmadığı faktı içimi qürur hissi ilə doldurub. Bu gün zaman fərqlidir. Daha sürətli, daha mürəkkəb. Elm də mürəkkəbləşib, texnika da, yaradıcılıq da. Belə bir zamanda “Dünya çaplı” adam olmaq asan məsələ deyil və bizim ədəbi mühitdə belə adamları bir əlin barmağı ilə saymaq olar.

Qismət o nəhayətsiz azlığın içərisindədir!

Yazı-pozusundan əlavə bir ziyalılıq, müəllimlik missiyası da var. Görünür, bu da bir taledir və insanın boyuna biçilir. Istəsən də kənara çıxa bilmirsən.

Yazdığı şeir və esselərin yanı sıra çevirdiyi çox dəyərli yazı və kitablar da var. Üstəlik çağdaş Amerika romançılığından elmi iş yazır. Onun kitabxanası Azərbaycanın ən zəngin kitabxanalarındandır. Hamımız bu zəngin dünyadan yararlanmışıq.

Qismət müasir şeirin və nəsrin nə olduğunu bir-iki saatın içində ən yüksək səviyyədə anlada bilər. Onun qiymətini alan əsərlərə, zənnimcə, dünyanın heç bir yanında zaval yoxdur.

Ona kimsə Azərbaycan ədəbiyyatının QİSMƏTİ söyləmişdi. Məncə, dəqiq təsbitdir. Həmişə narazı qaldığım ədəbi mühitimiz üçün qənimət biridir. Tanrının hədiyyəsidir.

Mütərəqqi dünya ədəbiyyatının Azərbaycanda, Azərbaycanın mütərəqqi dünya ədəbiyyatında səlahiyyətli elçisidir.

Azərbaycanı dünyaya, dünyanı Azərbaycana daşımağın ustasıdır.

Bu gün 35 yaşını qeyd edir.

Adama elə gəlir 350 ildir dünyadadır və bu illərini oxumağa, öyrənməyə, insanları və cəmiyyəti tanımağa həsr edib.

Sağlamlıq və xoşbəxtlik diləyirəm.

Qalanını özü hamımızdan yaxşı bilir.

• İtalyan heykəltaraş Lorenso Kuinnin “Təbiətdə tarazlıq” sərgisi açıldı
• “Müasir incəsənətdə Göbəklitəpə” adlı sərgi açıldı
• "Masumlar apartmanı"nın aktrisası yeni serialda