Fil cinayət edə bilərmi? Edər. Hətta elədiyi cinayət üçün cəzalandırılar da! Özü də ən ağır maddəylə...

Bu, nağıl deyil. Gerçəkdən baş verib. 4 yanvar 1903-cü ildə Nyu-Yorkun lunaparkları ilə məşhur olan Koni adasında, min beş yüz nəfərin gözü qarşısında baş verib.

Topsi adlı yaşlı fili 6 min 600 voltluk elektrik cərəyanı ilə öldürüblər.

O, üç nəfərin ölümündə ittiham olunurdu.

Fonepaugh sirki tərəfindən 1875-ci ildə ABŞ-a gətirilən fil ABŞ-ın dörd bir yanını gəzərək minlərlə tamaşaçını əyləndirmişdi. Ancaq onun ciddi bir problemi vardı: çox qəzəbli idi!

Ömrünün son üç ilində öldürdüyü üç nəfərin üçü də Topsinin baxıcıları idi. Sonuncu qurbanı içkili vəziyyətdə ona yanan siqaret yedirmək istəmişdi və əvəzini həyatı ilə ödəmişdi.

Hadisədən sonra sirk fili Koni adasındakı zooparka göndərdi. İşə baxan məhkəmə Topsiyə ölüm cəzası verdi. Onu insanların gözü qarşısında dar ağacına çəkəcəkdilər.

Məhkəmənin hökmünün ardınca ABŞ-ın Heyvansevərlər Dərnəyi işə qarışdı, fil haqqında zalım qərar çıxarıldığını bildirdi. Protestlə hesablaşan məhkəmə Topsini o zamanlar üçün yeni üsul sayılan elektriklə öldürməyə qərar verdi və məşhur ixtiraçı Tomas Edisonu işə cəlb etdi.

T.Edison Topsini öldürməyə razılaşma səbəbi dünyanın ən qara piarı kimi tarixə düşdü. O, bu amansız səhnə ilə özünün nəzəriyyələrinə qarşı çıxan və ona ciddi rəqib olan Nikola Teslanın alternativ nəzəriyyəsinin nə qədər təhlükəli olduğunu göstərmək istəyirdi.

Filin öldürülmə səhnəsini də bu məqsədlə videoya çəkmişdi.

• Maykl Ceksonun ölümündə şok iddia: Özünü bilərəkdən öldürüb?
• Dünya kinosunun yumorist rejissoru - Tomas Mankeviçin 5 məşhur ekran əsəri
• Cob siqaret kağızı afişası, xəyalpərəslik... - Məşhur rəssamın 10 əsəri