Reklam yaradıcılıq, maraqlı ideya, fərqli yanaşma tələb edir. Müasir dövrdə ən yaradıcı insanlar, ən yaxşı reklamları çəkənlər sayılır. Bu günlərdə ABŞ-da dərgilərdə və küçələrdə gözəçarpan bir reklam var. Bu reklam bütün dünyada, xüsusilə müsəlmanlar arasında müzakirələrə səbəb olub. Kulis.az “Hürriyet” qəzetində istinadən qalmaqal yaradan firmanın reklamlarından bəhs edən məqaləni və fotoları təqdim edir.

Geyim firması “American Apparel”ın “Banqladeşli” reklamı skandala səbəb olub. Bunu reklam işində “inqilab” adlandıranlar da var, skandal sayanlar da.

Asiyalı bir qadının yarıçılpaq bədəni, üzərində də iri şriftlərlə yazı: “Banqladeşdə istehsal olunmuşdur”. Reklamın altındakı mətn qadının geydiyi cins şalvarın deyil, şəxsən özünün Banqladeşdə istehsal edildiyindən bəhs edir. Qadının adı Maks. Doğulduğu yer Dəkkə. Müsəlman dəyərlərinə sadiq olan ailəsi illər öncə ABŞ-a köçüb. Reklam mətnində yazılıb ki, müsəlman dəyərlərindən bezən və özünə yeni bir obraz yaratmaq məqsədi ilə dindən uzaqlaşıb.

Bu bir “American Apparel” reklamıdır. Hər dəfə qalmaqallı reklamları ilə daha da məşhurlaşan geyim firmasının sonuncu “hoqqasıdır” bu. Reklamı yaradanlar bir daşla iki quş vurmaq istəyiblər. Birincisi, məhsullarının harada hazırlandığına diqqət çəkmək: mətni oxuyanlar məhsulların Banqladeşdə yox, elə Amerikada hazırlandığını öyrənmiş olurlar. İkincisi isə, yeni bir qalmaqal yaradaraq məhsullarını tanıtmaq. Onlar hər zaman belə reklam yollarına əl atırlar, amma budəfəki çox sərtdir. Firma qəsdən Banqladeşi seçərək başqa bir hadisəyə işarə vurmuş olur: təxminən bir il qabaq Banqladeşdə dünyaca məşhur bir çox markanın atelyesinin yerləşdiyi “Rana Plaza” çökmüş, 1129 işçi ölmüşdü.

Maksın müsəlman olmağının vurğulanması və bundan da şok effekti yaratmaq istəyi başa düşüləndir. Bundan qabaqkı reklamlarında firma qeyri-adi üsullara əl atıb. Pornoqrafiyaya yaxın olan fotolar, dəyərlər sistemi ilə məzələnən mesajlar, böyük moda həftələrində heç vaxt iştirak edə bilməyəcək və bu günün modasının gözəllik standartlarına cavab verməyən həvəskar modellər... Hətta firmanın kataloqunda porno ulduzların çəkildiyi reklamlar da var. Fotoları şəxsən firmanın sahibi Dov Çarney çəkir. O deyir ki, əsas olan təbiilikdir. Qalmaqal isə sonra yaranır.

Sözügedən qalmaqallı fotolara baxa bilərsiniz.

• Aleksandr Kalyagin kino karyerasını yekunlaşdırdı
• Beynəlxalq Şerlok Holms Günü qeyd olundu
• Sеvgilim, dayanma, sahilə gəl - Mikayıl Müşfiq