Bayrağımız Xankəndidə yellənsin! - Əjdər Oldan Qarabağ şeirləri

Bayrağımız Xankəndidə yellənsin! - Əjdər Oldan Qarabağ şeirləri
26 oktyabr 2020
# 12:29

Kulis.az tanınmış şair Əjdər Olun yeni yazdığı Qarabağ şeirlərini təqdim edir.

Qəzan mübarək!

Əgər gedirsənsə haqq savaşına,
Qəzan mübarəkdir, qəzan mübarək!
Bu halal kəlməni sətir başına
yazan, mübarəkdir, qəzan mübarək!

Sən ki, qan tökmürsən, qanı alırsan,
Əlindən nə gedib, onu alırsan,
Sən Salur oğlusan, Banu alırsan,
Qazan, mübarəkdir, qəzan mübarək!

Namus savaşıdır sənin savaşın,
Başında tay-tuşun, dostun, yoldaşın,
Yağıdan aldığın torpağın, daşın,
fəzan mübarəkdir, qəzan mübarək!

Qarabağ itməyib, bizdən getməyib,
Biz ordan getmişik, fürsət ötməyib.
Sən oxu, mənim də sözüm bitməyib,
Ozan, mübarəkdir, qəzan mübarək!

Yadından çıxmasın çoxdan verdiyin,
Artıq torpağın yox, yoxdan verdiyin,
Nahaq düşməninə haqdan verdiyin
cəzan mübarəkdir, qəzan mübarək!

Canında qalsa da lap yarı canın,
Qazi tək dönməyə vardır inamın,
Əgər şəhid olsan, şəhidlik qanın,
əzan mübarəkdir, qəzan mübarək!

Əjdər Ol kimdir ki, bir yuxu yozan,
Düşmən halay çəkib, sən Halaypozan,
Qazan, igid əsgər, qələbə qazan,
qazan, mübarəkdir, qəzan mübarək!
Qəzan mübarəkdir, qəzan mübarək!

Çağırş

“Qarabağ Azərbaycandır və nida!”
Azərbaycan Respublikasının Prezidenti İlham Əliyev

Keçdi əks hücuma şanlı ordumuz,
Qələbə gözləyir doğma yurdumuz,
Gedirik irəli, gəlir ardımız,
Düşmənin dilinin ucunda vida,
Qarabağ bizimdir, bizim və nida!

Yoxolmuş yox olub yoxa çıxacaq,
Bayrağım yeriyib dağa çıxacaq,
Laçına çıxacaq, Tuğa çıxacaq,
Həsrətdən güc aldıq, sevgidən qida,
Qarabağ bizimdir, bizim və nida!

Murov zireh çəkib “üzləyib” bizi,
Kəlbəcər illərlə özləyib bizi,
Ağdam hər dəqiqə gözləyib bizi,
Kəsməz yolumuzu ölüm, qan-qada,
Qarabağ bizimdir, bizim və nida!

Günəş işıq tutub, Ay yaxıb şamı,
Elə bil dəyişib həyatın tamı,
Şuşa sevgisinə can atır hamı,
Hamıya yuxuda verilib buta,
Qarabağ bizimdir, bizim və nida!

Azərbaycanımın qəlbi Qarabağ,
Yenilməz, möhtəşəm, qəlbi Qarabağ,
Ey hərbi geyimli hərbi Qarabağ,
Yağı öz xoşuna çəkilsin, ya da...
Qarabağ bizimdir, bizim və nida!

Ey dağım, ey daşım, bizə səngər ol!
Ey dostum, qardaşım, zabit, əsgər ol!
Canını dişində tutub Əjdər Ol,
Əsgər marşı ilə yeriyir o da..
Qarabağ bizimdir, bizim və nida!

29 sentyabr 2020

Marş

Xankəndini gədə kəndi etdilər,
Özlərinin dədə kəndi etdilər,
Yalan, hiylə, hədə kəndi etdilər,
Dığaların dığırlanan vaxtıdır,
Oğruların oğurlanan vaxtıdır.

“Yersiz gəldi, yerli qaç”dı bularkı,
Hər addımda kilsə, xaçdı bularkı,
Güclülərlə marçamarçdı bularkı,
Yüz il dirsək göstərdilər yurduma,
İndi də dal göstərirlər orduma.

Mifçilərin çürük mifi dağıldı,
Bayquşların bərbad evi dağıldı,
Bir həmlədən düşmən səfi dağıldı,
Qarabağda millətimin var səsi,
Eşidilir kaman səsi, tar səsi.

Hayı gedib, qalıb daha vayları,
Saya vursan, bir şey deyil sayları,
Harayçılar atıb indi hayları,
Orda kimlər bəsləyirdi pətəklər,
Əldə gəlir tutduqları ətəklər.

Qayıt qardaş, yaşa da öz yerində,
Bəy, xan, sultan, paşa da öz yerində,
Ağdam, Laçın, Şuşa da öz yerində,
Bayrağımız Xankəndidə yellənsin!
Əjdər Ol da baxıb, baxıb şellənsin!

25 oktyabr 2020

# 7802 dəfə oxunub

Oxşar xəbərlər

"Bu, mənəvi korluğun, özündən uzağı görə bilməməyin etirafıdır" - Plagiat qalmaqalı böyüyür!..

"Bu, mənəvi korluğun, özündən uzağı görə bilməməyin etirafıdır" - Plagiat qalmaqalı böyüyür!..

15:00 15 iyul 2025
"Məmləkətdə ən böyük soyğunçu elə qibleyi-aləmin özüdür" - SSRİ-yə meydan oxuyan yazıçı

"Məmləkətdə ən böyük soyğunçu elə qibleyi-aləmin özüdür" - SSRİ-yə meydan oxuyan yazıçı

09:00 15 iyul 2025
“Allah yoxdur, amma Hz. Abbas başqa aləmdir” - Sekulyarizmi tənqid edənlərin məqsədi nədir?

“Allah yoxdur, amma Hz. Abbas başqa aləmdir” - Sekulyarizmi tənqid edənlərin məqsədi nədir?

15:00 14 iyul 2025
"Şpaqat" vəziyyəti - Mübariz Örənin hekayəsi

"Şpaqat" vəziyyəti - Mübariz Örənin hekayəsi

12:00 13 iyul 2025
"Bir erməni dəftərinə onları necə məğlub etdiyimizi yazdım…" - 28 yaşında vəfat edən Həsən Kürün film kimi həyatı

"Bir erməni dəftərinə onları necə məğlub etdiyimizi yazdım…" - 28 yaşında vəfat edən Həsən Kürün film kimi həyatı

11:50 8 iyul 2025
Məni dostlarım öldürdü - Akif Səmədin şeirləri

Məni dostlarım öldürdü - Akif Səmədin şeirləri

12:00 6 iyul 2025
#
#
# # #