«Apple Inc» şirkəti Amazon.com-un daha kiçik elektron planşetləri ilə rəqabəti genişləndirmək üçün bu cümə günü iPad-in 20 santimetrlik yeni versiyasının satışına başlayır.

«Reuters» agentliyi xəbər verir ki, yeni planşetlərini qiyməti gözlənildiyindən xeyli baha – 329 dollar olacaq.

Agentlik bildirir ki, belə qiymət tələbatı azalda bilər.

«Apple» ümid edir ki, bu addımı ilə, necə deyərlər, öz halal bazarı hesab etdiyi istehlakçı elektron malları bazarına müdaxilələrin qabağını ala biləcək.

Halbuki, şirkətin daha böyük ölçülü planşetlərini ilə hətta çox qüdrətli «Samsung Electronics» də rəqabət apara bilmir.

«Apple» şirkətinin rəhbərləri bu həftə tam-ölçülü iPad-in əksər funksiyalarına malik, lakin ondan ölçücə kiçik olan yeni cihazın təqdimatını keçiriblər.

Bununla belə, ekspertlər xəbərdarlıq edirlər ki, «iPad mini» alıcını şirkətin əsas məhsulu olan 499 dollarlıq və 25, 4 santimetr ölçülü iPad-dən qaçıra bilər və üstəlik, yeni məhsul Amazon-un «Kindle» və Google-un «Nexus 7»si ilə rəqabətə tab gətirməyə bilər.

Maraqlıdır ki, «iPad mini»nin təqdimatında onu konkret rəqib məhsulla – Google-un populyar «Nexus 7» kitabçası ilə müqayisə ediblər. «Apple» adətən özünü heç bir şirkətlə müqayisə etmir.

Bundan əlavə, «Apple» şirkətinin tam ölçülü iPad-lərin 4-cü nəslinin istehsalına başlayacağı barədə xəbər də gözlənilməz olub.

Belə ki, üçüncü nəslə aid kitabçalar satışa cəmi altı ay bundan əvvəl buraxılmışdı.

«Reuters» agentliyi yazır ki, «Apple» iPad-i 2010-cu ildən dövriyyəyə buraxıb və o vaxtdan bəri mobil kompüterləşdirməni özünün «apps» əsaslı modeli ilə təkmilləşdirərək kompüter bazarının böyük bir hissəsini zəbt edib.

Amazon-un «Kindle» və Google-a məxsus «Nexus 7» planşetləri daha kiçik payla kifayətlənməli olublar.

İndi kiçik ölçülü iPad-in istehsalı ilə «Apple» o kiçik bazara da şərik çıxmaq niyyətindədir.
Amazon-un məhsulları təxminən 200 dollara olmaqla, xüsusən bayram hədiyyəsi kimi çox yaxşı satılır.

Amazon ötən dekabrın bir həftəsi ərzində milyon ədəd «Kindle» satıb.

Şirkət həmçinin özünün yeni, ikinci nəsil «Kindle Fire HD» planşetlərini satışa çıxaracağı barədə elan verib.

Beləliklə, «Apple», Amazon və Google xristian dünyasında ən hörmətli bayram olan Milad ərəfəsində Amerikanın və Avropanın mağazalarında əsl rəqabətə çıxacaqlar.

Bu mənada, «Apple» şirkətinin yeni, kiçik ölçülü, lakin bahalı məhsulu problemlər yaşaya bilər.

ABŞ-dakı istehlakçı qrupları bildiriblər ki, «iPad mini» üçün ən münasib qiymət 250 dollar olmalı idi.

Azadliq.org

• Əməkdar artist Akif Mirabov vəfat edib
• Kino Agentliyi müsabiqənin qaliblərini açıqlayıb
• Yadigar Muradovun son vəziyyəti - Açıqlama