Ölümü nar kimi sıxdı gözünə - Günün şeiri

Ölümü nar kimi sıxdı gözünə - Günün şeiri
25 dekabr 2023
# 15:40

Bu gün tanınmış şair Ramiz Qusarçaylının doğum günüdür.

Kulis.az "Günün şeiri" layihəsində onun "Atamın xatirəsi" şeirini təqdim edir.

Gözündən ölməyə başladı atam,
Gözündən düşməyə başladı dünya.
Saraldı gözünün ağ çiçəkləri,
Gəlib gözlərində qışladı dünya…

Ölümü nar kimi sıxdı gözünə,
Gözünün içində nar çiçəklədi.
Öpdü gözlərindən ölüm mələyi,
Gözünün odunda qar çiçəklədi.

Gördüm ki, soyuyur həyət-baca da,
Gördüm buz sallanır gül tağlarından.
Bağın başındakı qoz ağacı da
Asılıb qarğanın ayaqlarından…

Pəncərə önündə gilas ağacı
Hamıdan gizlicə
Tək ağlayırdı.
Quru budaqları qara əl kimi
Divarın üzünü cırmaqlayırdı…

Gözləri çıxmışdı hədəqəsindən,
Sanki kirpiyində dağ dolaşırdı.
Həyat gözlərində özgələşirdi,
Gözləri ölümlə doğmalaşırdı.

Göz-göz oxşayırdı ölümü atam,
Oxşaya-oxşaya nələr danışdı…
Gözləri ölümə sığmadığından
Öləndən sonra da yumulmamışdı.

Dünyanın şəklindən qaçıb gözləri,
Ölümün şəklini çəkirdi o gün.
Ölümün şəklini olduğu kimi
İlk dəfə atamın gözündə gördüm…

Gözüylə dünyanın arasındakı
İşıqlı nə varsa uçuracaqdı.
Elə yapışmışdı gözü ölümdən,
Elə bil əlindən qaçıracaqdı…

Ölməyə heç nəyi yox idi o gün,
Nəfəsi yox idi, dili yox idi.
Elə nazlanırdı gözündə ölüm,
O gün ondan gözəl ölü yox idi…

Gözünə dikilən gözlərdən qaçıb,
gözünə tökülən səslərdən qaçıb,
gözünə çəkilən bizlərdən qaçıb
gözüylə öpüşdü yetimliyiylə,
gözüylə öpüşdü yavanlığıyla,
gözüylə öpüşdü uşaqlığıyla,
gözüylə öpüşdü cavanlığıyla.
öpmək istəmədi qocalığını,
gözləri üzünü yana çevirdi…

Yolu iman yolu,
yolu can yolu,
getdi öz yoluyla, iziylə getdi.
Gözündən qəbrinə uzanan yolu
Atam bizdən qabaq gözüylə getdi…

# 1217 dəfə oxunub

Oxşar xəbərlər

Mən səni torpağa verəndə bildim... - Məmməd İlqarın şeirləri

Mən səni torpağa verəndə bildim... - Məmməd İlqarın şeirləri

14:30 21 fevral 2025
Küçələrə qar yağır, adamlara qar yağır... - Ən gözəl qar şeirləri

Küçələrə qar yağır, adamlara qar yağır... - Ən gözəl qar şeirləri

13:34 21 fevral 2025
Həmid Herisçi:  "O gün məni yenə həbs etmişdilər"

Həmid Herisçi: "O gün məni yenə həbs etmişdilər"

12:50 12 fevral 2025
Sevgilimlə iki söz arasında... - Əli Kərim

Sevgilimlə iki söz arasında... - Əli Kərim

15:22 10 fevral 2025
Nəyə lazım hamı bilə, sevirəm səni - Balaş Azəroğlu

Nəyə lazım hamı bilə, sevirəm səni - Balaş Azəroğlu

13:02 10 fevral 2025
Gecələr yuxuma girərdi Allah - Adil Mirseyid

Gecələr yuxuma girərdi Allah - Adil Mirseyid

11:12 10 fevral 2025
#
#
# # #