Bu günlərdə yazıçı Mirmehdi Ağaoğlunun "Zəfərin izi ilə" adlı kitabı işıq üzü görüb. Kitaba müəllifin 44 günlük Vətən müharibəsindən sonra işğaldan azad olunmuş ərazilərə səfərləri zamanı hazırladığı reportajlar daxil edilib.

Yazıçı Mirmehdi Ağaoğlu kimdir?

Mirmehdi Ağaoğlu 15 oktyabr 1982-ci ildə Neftçala rayonunun Aşağı Qaramanlı kəndində anadan olub. 1990-2000-ci illərdə Bakı şəhəri Sabunçu rayonu 170 saylı orta məktəbdə təhsil alıb. 2000-2004-cü illərdə Azərbaycan Dövlət İqtisad Universitetində mühasibat uçotu fakültəsində oxuyub.

2005-ci ildən ''Mirmehdi Ağaoğlu'' imzasıyla mətbuatda dərc olunmağa başlayıb.

2008-2012-ci illərdə "Xalqbank"da kassir vəzifəsində çalışıb. 2012-2018-ci illərdə isə "Kulis.az" internet dərgisində redaktor kimi fəaliyyət göstərib. Hazırda APA İnformasiya Agentliyində redaktor vəzifəsində çalışır.

Yazıçının 2011-ci ildə "Görüş" adlı romanı işıq üzü görüb.

2012-ci ildə "Küləyi dişləyən" adlı romanı ilə oxucuların qarşısına çıxıb.

2015-ci ildə "Bu gün səbr elə" adlı romanı çap olunub.

2016-cı ildə "Alman malı" adlı müxtəlif illərdə qələmə aldığı hekayələrindən ibarət kitabı "ATV Kitab" seriyasından "Parlaq imzalar" nəşriyyatında çap edilib.

2020-ci ildə "Oğlum üçün hər şey" adlı kitabı Türkiyədə işıq üzü görüb.

2021-ci ildə "Zəfərin izi ilə" adlı kitabı çap olunub. Kitaba müəllifin 44 günlük Vətən müharibəsindən sonra işğaldan azad olunmuş ərazilərə səfərləri zamanı hazırladığı reportajlar daxil edilib.

Mirmehdi Ağaoğlunun "Küləyi dişləyən" romanı 2011-ci ildə keçirilən Milli Kitab Mükafatında qısa siyahısına düşüb və beşinci yerin sahibi olub.

2015-ci ildə Azərbaycan Yaradıcılıq Fondu və Azərbaycan Respublikası Dini Qurumlarla İş üzrə Dövlət Komitəsinin birgə keçirdiyi "Quran motivləri əsasında hekayə" müsabiqəsinin qalibi olub.

2017-ci ildə Azərbaycan Respublikası Mədəniyyət və Turizm Nazirliyinin təsis etdiyi "Qızıl Kəlmə" ədəbi mükafatının "Şans" ödülünə sahib olub.

2017-ci ildə ədəbi-publisistik fəaliyyətinə görə "Ədəbiyyat qəzeti"nin təsis etdiyi "Əli bəy Hüseynzadə" mükafatına sahib olub.

2017-ci ilin dekabr ayında "85-ci gün" adlı hekayəsi İranın Şiraz şəhərində keçirilən Dialoq və Əməkdaşlıq uğrunda İslam Əməkdaşlıq Təşkilatı Gənclər Forumunun Birinci Qısa hekayə müsabiqəsində qalib olub.

• Amsterdamda qeyri-adi muzey açıldı – Burada heyvanlar sərbəstdir, insanlar qəfəslərdə
• Cəbrayıl Şəhəri Günü təntənəli şəkildə qeyd olundu
• Qadınların gündəlik həyatını əks etdirən qədim dolab tapıldı