Elm adamları zaman maşını üzərində işləyirlər. Ehtimal olunur ki, nə vaxtsa keçmişə və gələcəyə getmək praktiki olaraq mümkün olacaq.

Bu kəşf baş tutsa zaman maşınında hansı dövrə getmək istəyərdiniz?

Kulis.Az tanınmış sənət adamları arasında bu barədə sorğu keçirib. Cavabları təqdim edirik.

Əkrəm Əylisli

- Mən keçmişi gələcəkdən ayırmıram. Bütöv görürəm zamanı. Elə bir zamanı görmək istəyərdim ki, orda insanlar rahat olsun, yaddaşı ilə bir yerdə olsun. İnsan öz yaddaşı ilə insandır. Keçmiş olmasa gələcəyi görə bilməzsən. Mən heç bir əsrə yox, öz uşaqlıq dövrümə qayıtmaq istəyərdim. O vaxt hər şey işıqlı idi. Ağaclar, dağlar uca görünürdü mənə. Uşaqlığıma qayıdıb o vaxt gördüyüm Əylisi görmək istəyərdim. Dünyanın ən işıqlı dövrüdür o dövr.

Anar

- 30-cu əsrə getmək istəyərdim. 30 rəqəmindən xoşum gəldiyi üçün.

Salam Sarvan

- Özümü texnoloji basqının düşməni saydığımdan XVIII əsrdən o yana getmək istəyərdim. Gələcəkdə maraqlı heç nə olmayacaq. İnsanlar düzəltdikləri əşyaların ünsiyyətinə kənardan tamaşa edəcəklər. Darıxdırıcı bir dəmir dövrü gəlir qabaqdan.

Nərmin Kamal

- Sırf gələcəyin necə olduğunu bilmək üçün 30-40-cı əsrlərə getmək, görmək, sonra qayıtmaq istərdim.

Gülzar Qurbanova

- İnsan özü ilə bağlı olan gələcəyə getmək istəməz. Amma gələcək zaman... Bu başqadır. Yaradıcı insanlara hər bir dövrə getmək mümkündür; keçmişə də, gələcəyə də. Ona görə, biz təxəyyüldə gələcəyə də gedirik, keçmişə də. Mən Adəm və Həvvanın yanına getmək istəyərdim. Maraqlı gəlir mənə, görən, həqiqətən alma üstündə cənnətdən qovulublar, ya yox.

Müşfiq Ötgün

- Heç yerə getmək istəməzdim. Zamanla bağlı nostaljim yoxdur. Gələcəyə də getmək istəmirəm. Onu biz yaratmalıyıq. Gələcək indiki insanların içindən, əməllərindən doğur. Hazırına nazir psixologiyası da yoxdur məndə. Öz zamanımı dolğun yaşayıram.

Günel Şamilqızı

- Birincisi, zaman maşınının kəşf olunmağını istəmirəm. İnsanı təbiətdən uzaq salan, normal yaşamı məhv edən texnoloji yeniliklərdən qorxuram. İnsan elə bir varlıqdı ki, heç vaxt bir kəşfdən axıra kimi yaxşı məqsədlərlə istifadə etmir. Öz dövrümüzü ağ günə çıxartdıq, qaldı başqa dövrlər? Amma zaman maşını kəşf olunsa, maraq mənə güc gəlsə, Kortesin gəmisində olmaq, məhv edilməmişdən öncə Tenoçtitlanı görmək istərdim. İnsanlıq bir dəfə Yeni Dünya kəşf eləmişdi, amma onu da köhnə dünyanın gününə saldı.

• Adam öldürən yazıçı villasında tutuldu: 7 kitabına imza günü keçirəcəkdi
• Rusiyanın Xalq artisti vəfat etdi
• Ana niyə 3 günlük körpəsini dənizə ataraq öldürüb?