Kulis.az İqtisadiyyat və Sənaye Nazirliyinin mətbuat xidmətinin rəhbəri Abbas Əliyevin şeirlərini təqdim edir.

Özünə qayıda bilməyəcəksən...

Özündən əbədi itkinsən indi

Daha məhəbbətim alışdı, söndü

Mənim ki ürəyim biryolluq döndü

Özünə qayıda bilməyəcəksən.

Könlünü yüzünə açşan da, gülüm

Hər qəlbə min işıq saçsan da, gülüm.

Sən məndən nə qədər qaçsan da, gülüm

Özünə qayıda bilməyəcəksən.

Kölgəm yollarında bitəcək sənin

Yoxluğum qəlbini didəcək sənin

Ruhum da dalınca gedəcək sənin

Özünə qayıda bilməyəcəksən.

Gözündə əbədi yaş olacağam

Ömrünə ömürlük qış olacağam

Ölsən, məzarında daş olacağam

Özünə qayıda bilməyəcəksən.

Gecələr

Sənsizlik üzdü məni hər gecə-gündüz, gözəlim

Özümlə hey danışıb dərdimi böldüm gecələr.

Tənhalıq üzdü məni, qəmə qərq oldum, gülüm

Süzülən göz yaşımı xəlvəti sildim gecələr.

Həsrət nə, məhəbbət nə, sevgi nədir? Duymadın, yox

Bu odun atəşinə tək yandım, bildin gecələr?

Bu qədər əziyyəti, möhnəti versən də mənə

Xəyallar aləmimdə açılmış güldün gecələr.

Gündüzlər kənar gəzdin, dözdüm, axı neyləməli?

Yuxuma gəlmədin heç, vallahi öldüm gecələr.

Səndən ayrı...

Dalğasısan lal dənizin

Vüsalınla bal dənizin

Nəğmə olsan, ay əzizim

Dilə dönnəm, səndən ayrı.

Sən yandıran bir odam mən

Odu necə ovudum mən?

Bu mümkünmü-unudum mən

Belə dönüm, səndən ayrı?

Belə ömür dönər heçə

Bu qədər ki, həsrət içə.

Yollarından əsib keçən

Yelə dönnəm, səndən ayrı

...Sənsiz bir quru budağam

Suyu çəkilmiş bulağam

Bu dünyada bir qonağam

Köçəmmirəm, səndən ayrı.

• Qəzada həlak olan, ölümündən sonra gizli kitabçası tapılan Xalq artisti
• Çilovda "Tilov"a düşənlər - Ağa Cəfərli
• Uşaq Kitabxanasında aksiya: “Bir kitab, bir sevgi”