Bu gün Milli İncəsənət Muzeyində Xalq rəssamı Mikayıl Abdullayevin 100 illik yubileyinə həsr olunmuş "Həyata sevgi ilə" adlı sərginin açılış mərasimi olub.

APA-nın xəbərinə görə, tədbirdə çıxış edən mədəniyyət naziri Anar Kərimov deyib ki, Mikayıl Abdullayevin yaradıcılığı bütün dünyada tanınır.

Onun sözlərinə görə, rəssamın əsərlərinə baxanda Azərbaycan xalqına olan sevgisini görmək mümkündür: "Biz Mikayıl Abdullayevlə hər zaman fəxr etməliyik. Qısaca olaraq onun haqqında bu sözləri deyə bilərəm ki, o, rəssamlıq sənətini keyfiyyətcə yeni bir mərhələyə qaldıran sənətkar olub. Mikayıl Abdullayev hələ Sovet dövründə müxtəlif adlar, mükafatlar alıb. Bu nailiyyətlər təkcə Azərbaycan yox, Sovet İttifaqı miqyasında olan nailliyyətlərdir”.

Azərbaycanın müstəqilliyi dövründə də Mikayıl Abdullayevin yaradıcılığına böyük diqqət göstərildiyini vurğulayan nazir Ulu Öndər Heydər Əliyev tərəfindən "İstiqlal" ordeni ilə təltif edildiyini diqqətə çatdırıb: “Bu gün də onun yaradıcılığına daim diqqət göstərilir və təbliğ edilir. Bildiyiniz kimi Prezident İlham Əliyev Mikayıl Abdullayevin 100 illik yubileyinin qeyd edilməsi haqqında Sərəncam imzalayıb. Təsadüfi deyil ki, bu gün onun əsərləri dünyanın aparıcı muzey və qalereyalarında nümayiş olunur. Bu sərginin də adı təsadüfən belə seçilməyib. Bu ad onun prinsiplərini əks etdirir. Azərbaycan dövləti onun yaradıcılığını təbliğ edir, yeni nəsillərə ötürülməsinə çalışır. Bugünkü tədbirimiz də həmin məqsədlərə xidmət edir. Mədəniyyət Nazirliyinin təşəbbüsü ilə rəssamın büstü də hazırlanıb".

Azərbaycan Rəssamlar İttifaqının sədri, Xalq rəssamı Fərhad Xəlilov M.Abdullayevin yaradıcılığı haqqında danışıb. O bildirib ki, M.Abdullayevin adı Azərbaycan incəsənət tarixinə qızıl hərflərlə yazılıb: "Mikayıl müəllim sözün əsl mənasında Azərbaycanın böyük şəxsiyyəti olub. O, çox adamlara kömək edib, çox sahələrdə fəaliyyət göstərib, bizim bu gün tanınan rəssamlarımızın müəllimi olub. Bununla bərabər o, teatrlarda, tərtibat işlərində çalışıb. Çox gözəl kitablar yaradıb. Mən bir rəssam kimi deyə bilərəm ki, Mikayıl müəllim böyük rəssam, əsl ziyalı, Azərbaycan üçün gecə-gündüz çalışan bir adam idi. Mikayıl Abdullayev bizim qəlbimizdə daim yaşayacaq".

Sonra tədbir iştirakçıları sərgi ilə tanış olublar.

Qeyd edək ki, sərgi 2022-ci il martın 1-ə qədər davam edəcək.

• Azərbaycanda məşhur muzey ləğv edildi
• Məni sevib-sevməməyin vecimə deyil... - Günün mahnısı
• 10 manatlıq şəfa: xalq təbabəti, yoxsa fırıldaqçılıq? – Bakının “Çöpçülər məhəlləsi”ndən REPORTAJ