Kulis.az Yalçın İslamzadənin yeni yazısını təqdime dir.

Bir neçə il əvvəl soyuq və küləkli fevral günlərinin birində İçərişəhər metrosunun qarşısında atüstü yemək büfesinin qarşısında dayanmışdım. Satıcı yeməyi hazırlayırdı, 2-3 metr uzaqda bir uşaq hipnoz olmuş kimi vitrinə baxırdı. Əyni nazik idi, yəqin ki, çox üşüyürdü ancaq aclıq hökm etdiyi üçün soyuğu hiss etmirdi. Yeməklərə fokuslanmışdı. Satıcı hazır yeməyi uzadanda mən də yeməyi həmin uşağa uzatdım, sakitcə götürdü və uzaqlaşdı.

Yenidən sifariş vermək üçün növbəyə keçdim, məndən əvvəl iki gənc, yanlarında yaşlı bir adam vardı. Yaşlı adam gənc xanımlara deyirdi, "Siz gələcəyin analarısınız, bu soyuqda belə geyinmək olmaz. Həm də qısa geyinmək düzgün deyil" vs.

Əvvəl düşündüm ki, yəqin ataları və ya babalarıdır. Elədirsə, bu söhbəti küçədə niyə etsin? Soruşdum, dedilər, tanımırıq. Yaşlı adamı kənara çəkdim, dedim ki, iki metr aralıda aclıqdan hipnoz olmuş uşağı görmürsən, ancaq sənə dəxli olmayan məsələyə burnunu soxursan, qısa geyim görən kimi sensorların həyəcan siqnalı verib.

Kişi tələsik ordan uzaqlaşdı və bu hadisə simvolik hadisə kimi yadımda qalıb.

Gözlərinin qarşısında baş verən, onlara da aidiyyəti olan hadisələri görməzdən gəlirlər, onlara aidiyyatı olmayan, fərdi seçim məsələsi sayılan mövzulara burun soxmağa səlahiyyətli hiss edirlər.
İndi kütlələşmə dövrüdür. Kütlənin məntiqi mühakiməsi bəsitdir,

1. əxlaq = geyim tərzi
2. müasirlik = açıq geyim

deməli,

müasirlik = əxlaqsızlıq

Artıq kiminsə yazıları və əsərləri ilə hansısa qonorar almağı qeyri-mümkündür. Mətbuatın belə vərdişi yoxdur, mətbuata ayrılan vəsait tədbirlərə xərclənməlidir. Ona görə də məşhur olmaq və gəlir əldə etmək istəyən hiyləgərlər kütlənin qərəzlərinə xitab edirlər. Kütlə öz dəyərlərinə ziyalılardan daha sadiqdir.

Əsas tezis belədir: "Müasirlik gəldi, əxlaq əldən getdi".

Sanki bundan daha vacib məsələ yoxmuş kimi bu tezis qalstuklu yeni mollalar və klassik mollalar tərəfindən də mütəmadi gündəmdə saxlanılır. Bir qrup ideoloji məqsədlər üçün bu təbliğatı aparır, digər qrup vicdansız olduqları, savadsızlıqdan qazanç əldə etdikləri üçün. O da mümkündür ki, qalstuklu mollalar qalstuksuz mollaların görünüşcə daha məqbul variantları olduğu üçün əməkdaşlıq edirlər.

• Türkiyə musiqi sənayesində tarixi ilk
• Ömrün mərhələləri kətan üzərində - İtalyan rəssamdan “Zamanın müdriklik alleqoriyası”
• Çarəsizliyin ifadəsi, fövqəltəbii güc və gizli agent – Helli Berrinin 3 yaddaqalan rolu