Azərbaycan Musiqi Mədəniyyəti Dövlət Muzeyində “Poeziya Xəzrisi” Respublika bədii qiraət müsabiqəsinin qaliblərinin adı açıqlanıb.

Kulis.az xəbər verir ki, bu barədə muzey məlumat yayıb.

Bildirilib ki, müsabiqə Prezident İlham Əliyevin Nəbi Xəzrinin 100 illik yubileyinin qeyd edilməsi haqqında Sərəncamı əsasında Mədəniyyət üzrə Elmi-Metodiki və İxtisasartırma Mərkəzinin (MEMİM) təşkilatçılığı, Azərbaycan Teatr Xadimləri İttifaqının (ATXİ) təşkilati dəstəyi, “Qanun” nəşriyyatı və “MİMTA” yayınlarının tərəfdaşlığı ilə gerçəkləşib.

Tədbirdə Mədəniyyət Nazirliyi kitab sənayesi şöbəsinin müdiri Vasif Qurbanzadə, Azərbaycan Musiqi Mədəniyyəti Dövlət Muzeyinin direktoru sənətşünaslıq üzrə elmlər doktoru, Əməkdar mədəniyyət işçisi Alla Bayramova, ATXİ-nin sədri Xalq artisti Hacı İsmayılov və MEMİM-in direktor vəzifəsini icra edən sənətşünaslıq üzrə fəlsəfə doktoru, dosent Vüqar Hümbətov çıxış ediblər. Bildirilib ki, müsabiqə Nəbi Xəzri irsinin təbliği, bədii qiraətçilərin yaradıcılıq qabiliyyətinin inkişaf etdirilməsi, bu sahəyə marağın artırılması, gənclərin bədii-estetik zövqünün zənginləşdirilməsi məqsədilə təşkil olunub.

Nəbi Xəzrinin oğlu Arzu Babayev atasının yaradıcılığına göstərilən diqqətə görə müsabiqənin təşkilatçılarına təşəkkürünü bildirib.

Müsabiqənin münsiflər heyətinin üzvləri Əməkdar artist, professor Azad Şükürov, şair, dramaturq Əməkdar mədəniyyət işçisi İlqar Fəhmi müsabiqə barədə məlumat veriblər.

Müsabiqədə 50-yə yaxın namizəd arasından seçilən 14 iştirakçı finala vəsiqə qazanıb. Onlardan Anar Əhmədov I yerə, Ramil Hüseynzadə və Hüseynağa Aslanov II yerə, Səma Ağazadə isə III yerə layiq görülüblər.

Tədbirin bədii hissəsində Bakı şəhəri M.Maqomayev adına 26 nömrəli onbirillik musiqi məktəbinin müəllim və şagirdləri tərəfindən Nəbi Xəzrinin “Dəniz, göy, məhəbbət”, “Şəklinə baxıram”, “Söylə, bəs hardaydın”, “Külək”, “Dərdsiz adam axtarmayın”, “Kimi nə gözləyir?”, “Mənim ürəyimdir” şeirləri səsləndiriliblər. Həmçinin Xalq şairinin sözlərinə bəstələnmiş “Durnalar”, “Dərələr”, “Qəlbimdə qaldın” və “Azərbaycan” mahnıları ifa olunub.

• Sovet ekranlarının sehrli gecələri - Brejnev “Taleyin ironiyası"na niyə eyham vurmuşdu?
• Heç bir şey deməsən, sussam, sussan, sussaq... - Cemal Süreyanın şeirləri
• Səni niyə belə sevdim? - Vaqif Bayatlı Odər