Müslüm Maqomayev adına Azərbaycan Dövlət Akademik Filarmoniyasında Azərbaycan Respublikasının Xalq artisti, Azərbaycan rəqs sənətinin çoxəsrlik ənənələrinin qorunub saxlanılmasında və inkişafında müstəsna xidmətləri olan görkəmli xoreoqraf Əminə Dilbazinin 105 illik yubileyinə həsr olunmuş konsert keçirilib.

Kulis.az xəbər verir ki, konsertdə Azərbaycan xalq və bəstəkar mahnıları səsləndirilib, milli rəqslər ifa olunub.

Tədbirdə əməkdar kollektiv - Azərbaycan Respublikasının Xalq artisti Ağaverdi Paşayevin rəhbərliyi ilə Fikrət Əmirov adına Azərbaycan Dövlət Mahnı və Rəqs Ansamblı çıxış edib. Ansamblın xoreoqrafı Azərbaycan Respublikasının Əməkdar artisti Ceyhun Qubadov, xormeysteri isə Əməkdar artist Naala Barateliya olub. Gecənin solistləri Azərbaycan Respublikasının Əməkdar artistləri Günel Şeyxova, Elnur Süleymanov, Nigar Əhmədova, Nigar Rzayeva, Almaz Orucova, Nigar Hüseynova, Orxan Əliyev, Ramin Hüseynov, Xəyal Penahov, Anastasiya Matsveyko, Vəfa Orucova, Ayşən Mehdiyeva, Rəvanə Qurbanova, eləcə də aşıqlar Mübariz Əliyev və Firdovsi Eyvazov olub.

Əminə Dilbazi 1919-cu il dekabrın 26-da dünyaya göz açıb. Onun səhnə karyerası 1935-ci ildə, ilk dəfə milli estrada rəqslərinin ifaçısı kimi çıxış etdiyi vaxt başlayıb. 1939-cu ildə Əminə xanım ilk dəfə səhnədə xalq rəqslərini təqdim edib və bu, onun vizit kartına çevrildi.

1936-1969-cu illərdə o, Müslüm Maqomayev adına Azərbaycan Dövlət Filarmoniyasının mahnı və rəqs ansamblının solisti vəzifəsində çalışıb və müxtəlif dövrlərdə ansamblın rəqs qrupuna rəhbərlik edib. Görkəmli fəaliyyətinə görə 1954-cü ildə Azərbaycan SSR Əməkdar artisti, 1959-cu ildə isə Azərbaycan SSR Xalq artisti fəxri adlarına layiq görülüb.

Əminə Dilbazi müəllimlik və quruluş fəaliyyəti ilə də fəal məşğul idi. 1959-cu ildə Azərbaycan Tibb İnstitutunda yaradılmış “Çinar” tələbə rəqs kollektivinə rəhbərlik edib. 1962-1965-ci illərdə Azərbaycan Mahnı və Rəqs Ansamblına, 1967-1968-ci illərdə isə “Sevinc” rəqs ansamblının rəhbəri olub.

Onun xoreoqrafik istedadı teatr və kino üçün çoxsaylı tamaşalarda əks olunub. “Dədə Qorqud”, “Azərbaycan toyu”, “Bir bağın çiçəkləri” kimi tamaşalarda baş rolları ifa edib. Onun xoreoqrafı olduğu rəqslər “Leyli və Məcnun” operasına, “Arşın mal alan” və “O olmasın, bu olsun” komediyalarına bəzək verib. “İnnabı”, “Tərəkəmə”, “Vağzalı”, “Turacı” və “Naz eləmə” rəqs tamaşaları xüsusi rəğbət qazanıb.

Onun repertuarında təkcə Azərbaycan deyil, həm də rus, Ukrayna, özbək və ərəb rəqsləri də yer alırdı. Əminə Dilbazi Azərbaycan Musiqili Teatrı ilə əməkdaşlıq edib, osetin və özbək ansamblları üçün rəqslərin xoreoqrafiyasını da həyata keçirib.

16 yaşında yaradıcılıq yoluna başlayan Əminə xanım Azərbaycan rəqs mədəniyyəti tarixində parlaq və silinməz iz qoyub.

• Kişi “kim üçün?” sualının cavabını tapmalıdır
• Qrafikaya romantik ruh bəxş edən rəssam - Cəmil Müfidzadə yaradıcılığının estetikası
• Meyxanaçı Orxan Lökbatanlının ölüm xəbəri təkzib olundu