Dublinin Milli Qalereyasında qorunan "Qüllə pilləkənində görüş" (The Meeting on the Turret Stairs) əsəri həm kədərli hekayəsi, həm də nümayiş olunma qaydası ilə dünya incəsənətinin ən maraqlı nümunələrindən biridir.

Kulis.az xəbər verir ki, irlandiyalı rəssam Frederik Uilyam Börtonun 1864-cü ildə çəkdiyi bu akvarel əsəri son zamanlar tiktok və digər sosial platformalarda yenidən populyarlıq qazanaraq milyonlarla insanın diqqətini çəkib.

Orta əsr balladasından doğan faciəli eşq

Tablo orta əsr Danimarka balladasına əsaslanır. Hekayəyə görə, şahzadə Hellelil öz mühafizəçisi Hildebranda aşiq olur. Lakin bu sevgi Hellelilin sərt atası tərəfindən qəzəblə qarşılanır. Atası şahzadənin yeddi qardaşına Hildebrandı öldürməyi əmr edir. Qanlı döyüşdə Hildebrand atanı və altı qardaşı öldürsə də, sonda Hellelilin sonuncu qardaşının ölümcül zərbəsinə tuş gəlir. Hellelil isə bu dərdi danışdıqdan sonra ürək ağrısından vəfat edir.

Börton bu qanlı sonluğu deyil, cütlüyün ayrılmazdan əvvəlki son, titrək və ehtiraslı anını kətan üzərinə köçürüb.

Niyə həftədə cəmi iki saat?

Bu şahəsəri canlı görmək istəyənlər üçün zaman çox məhduddur. Bunun səbəbi isə sənət əsərinin fiziki həssaslığıdır:

İşığa qarşı həssaslıq: Əsər "quaj" texnikası (suda həll olunan boya) ilə çəkilib. Bu boyalar birbaşa günəş işığına və ultrabənövşəyi şüalara qarşı həddindən artıq həssasdır; işıq rənglərin solmasına səbəb ola bilər.

Xüsusi ritual: Qalereya rəhbərliyi əsəri qorumaq üçün onu xüsusi hazırlanmış qapalı şkafda saxlayır. Həftənin müəyyən saatlarında işıqlar azaldılır və işçi heyəti tərəfindən şkaf təntənəli şəkildə açılaraq əsər nümayişə çıxarılır.

Görüş saatları: Tabloya yalnız cümə axşamı (11:30-12:30) və bazar günü (14:00-15:00) baxmaq mümkündür.

"Öpüş - müqəddəs bir andır"

Məşhur yazıçı Corc Eliot bu rəsm haqqında demişdi: "Rəssam bu mövzunu ən bayağı şəkildə də təqdim edə bilərdi, lakin o, bunu nəcib duyğuların ən yüksək zirvəsinə qaldırıb".

Eliot üçün Hildebrand "öpüşü müqəddəs bir ayin hesab edən kişi" obrazıdır.

Dublin Milli Qalereyasının direktoru Karolin Kempbell bildirir ki, bu rəsm İrlandiyada sarsılmaz məhəbbətin simvoluna çevrilib. Hətta bir çox insan məhz bu tablonun qarşısında evlilik təklifi edir.

Müasir dövrün "tez bitən" münasibətləri fonunda, 162 illik bu əsər sevgisi uğrunda hər şeyi gözə alanların əbədi xatirəsi kimi 2026-cı ildə də öz aktuallığını qoruyur.

Ülvi Bahadır

• «Vətən - ən gözəl uydurmadır, anacan!» - "Patriarxın payızı"ndan bir hissə
• "Avroviziya" ilk dəfə Asiyada keçiriləcək
• Yazıçı İlham Əzizin "Qəvvas" romanının təqdimatı keçirildi